'राष्ट्र, राष्ट्रियता, धर्म, संस्कृति र नागरिक बचाउ महाअभियान' का संयोजक दुर्गा प्रसाईंलाई प्रहरीले घरबाट बाहिर निस्कन दिएको छैन।
भक्तपुरको पुरानो ठिमीस्थित घरबाट प्रसाईंलाई आन्दोलनमा जान प्रहरीले रोकेको छ। प्रसाईंले शुक्रबारदेखि काठमाडौंको तीनकुनेमा आन्दोलन गर्ने तयारी गरेका थिए।
प्रसाईंले आफूलाई घरबाट बाहिर जान नदिइएको शुक्रबार पत्रकार सम्मेलन गरी बताएका छन्।
‘यसरी मलाई नियन्त्रण गर्छन् भने मलाई कुनै आपत्ति छैन। हामी व्यवस्था विरोधी होइनौं, यिनीहरूले गरेको आचरण विरोधी हौं। गरिबहरूको घरजग्गा लुटियो, यसो नगरौं न भन्दा आज म हाउस अरेस्ट हुनुपर्ने?,’ घरमै प्रसाईंले संचारकर्मीहरूसँग भने, ‘नागरिक जोगाउन आएका साथीहरूलाई पक्राउ गर्ने?’
प्रसाईंले तीनकुनेमा कार्यक्रम गर्न अनुमति नलिएको भक्तपुरकी प्रमुख जिल्ला अधिकारी रोशनीकुमारी श्रेष्ठले सेतोपाटीलाई जानकारी दिइन्। यस्ता कार्यक्रम गर्न अनुमति लिनुपर्ने उनको भनाइ छ।
तर प्रसाईंलाई घरमै नजरबन्दमा नराखिएको उनले बताइन्।
‘लोकतान्त्रिक व्यवस्थामा कसैलाई सजिलै नजरबन्दमा राखिँदैन। यसबारे कतै निर्णय भएको पनि छैन,’ उनले भनिन्, ‘उहाँले आज कार्यक्रम गर्ने भनेर प्रेस विज्ञप्ति जारी गर्नुभएको छ, पत्रकार सम्मेलन गर्नुभएको छ। उहाँका अभिव्यक्तिअनुसार त्यो कार्यक्रम शान्तिपूर्ण हुँदैन कि भन्ने हामीलाई लागेको हो। काठमाडौंको तीनकुनेमा कार्यक्रम गर्न अनुमति पनि लिनुभएको छैन।’
उनकाअनुसार स्थानीय प्रशासन ऐनले २५ जनाभन्दा बढी भेला हुन प्रशासनसँग अनुमति लिनुपर्ने व्यवस्था गरेको उनको भनाइ छ।
‘प्रशासन ऐनअनुसार २५ जनाभन्दा बढी भेला हुन अनुमति लिनुपर्छ। उहाँले अनुमति नलिएको, सुरक्षा थ्रेट बढेको कारणले, मानिसहरूलाई सडकमा जान दिन मिल्दैन,’ उनले भनिन्, ‘उहाँले बल्खुमा कार्यक्रम गर्न जान्छौं भन्नुभयो भने हामी स्कर्टिङ गरेर जान दिन तयार छौं।’
प्रसाईंको घरमा केही दिनयतादेखि नै सुरक्षाका लागि प्रहरी परिचालन गरिएको उनको भनाइ छ।
प्रसाईंले तीनकुनेमा कार्यक्रम गर्न अनुमति नलिएको काठमाडौंका प्रमुख जिल्ला अधिकारी जितेन्द्र बस्नेतले बताए। प्रसाईंले अनुमतिबिनै बिहीबार बल्खु क्षेत्रमा कार्यक्रम गरेको प्रशासनको भनाइ छ।
बल्खुमा कार्यक्रम गर्न अनुमति लिन प्रशासनले प्रस्ताव गरे पनि कोही सम्पर्कमा नआएको प्रजिअ बस्नेतले बताए।
‘उहाँले जबरजस्ती तीनकुनेमा कार्यक्रम गर्ने भन्ने खालको सूचना पाइरहेका छौं। त्यहाँ हामी कार्यक्रम गर्न दिँदैनौं। त्यहाँ प्रदर्शन गर्न पुगे हामी कानुनी कारबाही गर्छौं,’ उनले भने।
जिल्ला प्रशासन कार्यालयलाई पूर्वजानकारी नगराई कार्यक्रम गर्न नमिल्ने उनले बताए। बिहीबार बल्खुमा गरेको कार्यक्रममा प्रसाईंले अराजक अभिव्यक्ति दिएका कारणले पनि प्रशासन सतर्क भएको उनले बताए।
‘हिजोको कार्यक्रममा जहाँ कार्यक्रम गरे पनि निषेधित क्षेत्र तोड्ने, शान्ति भंग गर्ने, आगजनी गर्ने, विभिन्न उच्च पदाधिकारीको घर तोडफोड गर्ने, हातपात गर्ने, जस्ता कार्यक्रम सार्वजनिक गरेकाले उहाँको कार्यक्रम संविधानअनुकूल र शान्तिपूर्ण हुने देखिएन,’ उनले भने, ‘त्यस्तो कार्यक्रम प्रशासनले निषेध गर्न सक्छ। यद्यपि उहाँहरूलाई हामीले फोन नै गरेर शान्तिपूर्ण गर्ने भए छलफल गर्न सकिन्छ भनेका छौं।’
बिहीबार प्रसाईं पक्षले बल्खुमा गरेको कार्यक्रममा पनि एउटा समूह कुलेश्वरतर्फ अघि बढ्न खोजेको उनले बताए। प्रसाईंले बोलिसकेपछि भिड त्यस समूहमा मिसिएर प्रहरीमाथि आक्रमण गरेको उनको भनाइ थियो।
‘आज पनि उहाँहरूको कार्यक्रम हिजोकोजस्तै गर्ने नै देखिन्छ। अराजकता फैलाउने काम प्रसाईंले मात्रै होइन, कसैले पनि गर्न पाइन्न। प्रसाईंले अन्य जिल्लामा गरेजस्तो यहाँ काठमाडौं हुँदैन,’ उनले भने।
प्रदर्शन गर्न तीनकुनेमा पुगेकाहरूलाई प्रहरीले नियन्त्रणमा लिएको छ।