नेकपा (एकीकृत समाजवादी) का अध्यक्ष माधवकुमार नेपालले राजतन्त्र ल्याउनका लागि भएको आन्दोलन व्यर्थ भएको बताएका छन्।
भूकम्प प्रभावित क्षेत्रबाट फर्किने क्रममा मंगलबार बिहान सुर्खेतमा पत्रकारहरूसँग बोल्दै नेपालले राजतन्त्र ल्याउने कुरा कल्पना मात्रै भएको बताए। उनले अब नेपालका लागि राजतन्त्र इतिहासमा मात्र सिमित हुने बताए।
‘गणतन्त्र जनताको व्यवस्था हो, यो कुनै परिवार र खानदानको व्यवस्था होइन,’ नेपालले भने, ‘सरकार र मन्त्रीको विषयमा प्रश्न उठाउन सकिएला, तर फेरि पनि राजतन्त्र ल्याउँछु भन्नु कल्पना मात्र हो।’
राष्ट्रपतिलाई दोष दिएर राजा ल्याउन खोज्ने बहानामा आन्दोलन नगर्न पनि आग्रह गरे।
‘सरकारले गलत काम गरेको छ भने सरकारविरूद्ध उभिनुपर्यो, तर व्यवस्थाको विरोध गर्दै राजसंस्था नारा लगाउनु वाहियात हो,’ उनले भने।
उनले मेडिकल व्यवसायी दुर्गा प्रसाईंको आन्दोलन राजावादीहरूबाट परिचालित भएको आरोप लगाए। नेपालका लागि यस्ता आन्दोलन उपलब्धिविहीन हुने नेपालले बताए।
पछिल्लो समय देशमा देखिएको आर्थिक संकट र संघीयताको विषयमा भएका गल्ती कमजोरी सबैले सच्याउनुपर्ने उनले बताए। मुलुकमा देखा परेको आर्थिक संकट र जनताले भोगिरहेका समस्या समाधानको विषय समग्रमा सोच्नुपर्ने बेला आएको नेपालले बताए।
उनले भूकम्प पीडितको पुनर्स्थापना र आवास पुनर्निर्माणका सन्दर्भमा सरकारले प्रभावकारी कदम चाल्नुपर्ने बताएका छन्।
‘भूकम्प पीडितको अवस्था दयनीय छ, राहत र उद्धार प्रभावकारी भएपनि पुनर्स्थापना र पुनर्निर्माण प्रभावकारी भएको देखिँदैन,’ उनले भने, ‘सबै मिलेर भूकम्प पीडितको पुनर्स्थापना र पुनर्निर्माणमा हातेमालो गर्नु जरुरी छ।’
