नेकपा (एमाले) का अध्यक्ष केपी शर्मा ओलीले देशलाई विकासको बाटोमा अघि बढाउन एमालेको एकल बहुमतको सरकार चाहिने बताएका छन्।
दैलेखको राकममा आइतबार भएको कार्यक्रममा बोल्दै ओलीले एमाले सरकारबाट हटेपछि अस्थिरता र अराजकता छाएको बताए।
‘देशलाई विकासको बाटोमा अघि बढाउन एमालेको एकल बहुमतको सरकार चाहिन्छ, अनि मात्रै देश बनाउन, विकास गर्न, सुशासन ल्याउन सकिन्छ,’ ओलीले भने, ‘अहिलेको गठबन्धन सरकारबाट जनता वाक्कब्याक्क भइसकेको मैले यी चार दिनमा देखेको छु।’
उनले 'प्रतिगमनतिर फर्कने कुरा देशद्रोही' भएको बताए। ‘त्यो लोकतन्त्र विरोधी कुरा हो। जनतालाई गरिब राख्न खोज्ने कुरा हो,’ उनले भने, ‘लोकतान्त्रिक गणतन्त्रविरूद्ध कसैले बोल्छ, सोच्छ भने त्यो नेपाल र नेपालीको हितमा बोलिरहेको छैन,’ ओलीले भने।
एमालेलाई सरकारबाट हटाइएपछि देशमा राजनीतिक अस्थिरता बढेको उनले दाबी गरेका थिए।
‘युवा विदेशिनुपर्ने र रोजगारी नपाउने अवस्था बनेको छ। अर्थतन्त्र चौपट भएको छ,’ उनले भने, ‘एमाले सरकारमा हुँदा गरिबी पनि घटेको थियो।’
(न्युज एजेन्सी नेपाल)
