‘झुलाघाट–चिवाभञ्ज्याङ, समृद्धिका लागि संकल्प यात्रा’ अन्गर्त मध्यपहाडी लोकमार्ग यात्रा गरिरहेको नेकपा एमालेले सोमबार सुर्खेतमा सभा गर्ने भएको छ।
सोमबार दिउँसो २ बजे सन्देश सभाका रुपमा सुर्खेत जिल्ला आमसभा गर्न लागिएको हो।
त्यसअघि दैलेखका राजनीतिक दलका नेताहरुसँग भेटघाट तथा छलफल गर्ने कार्यतालिका छ। त्यसैक्रममा दैलेखमै नागरिक भेटघाट पनि गरिने एमालेका कर्णाली प्रदेश सदस्य नवराज महताराले बताए।
सुर्खेतको आमसभाअघि दैलेखको गुराँस गाउँपालिकाको नवनिर्मित प्रशाकीय भवन एमाले अध्यक्ष केपी शर्मा ओलीले उद्घाटन गर्ने भएका छन्। आजै यात्रामा रहेको पाटी अध्यक्ष ओलीले दैलेखको श्रीस्थान मन्दीर पेट्रोलियम पदार्थ अन्वेषण स्थलको अवलोकन गरेको महताराले बताए।
सुर्खेतको आमसभापछि ओलीले आजै साढे ४ बजे काँक्रेबिहार क्षेत्रको अवलोकन गर्नेछन् भने सुर्खेतका उद्योगी, व्यवसायी तथा बुद्धिजिवीहरुसँग भेट गर्नेछन्। बेलुका साढे सात बजे वीरेन्द्रनगर नगरपालिकाका कार्यपालिका टोलीसँग भेटघाट गर्ने कार्यतालिका तय गरिएको छ।
अध्यक्ष ओलीसहितको टोली आज सुर्खेतमै बास बस्नेछ।
नेकपा एमालेले आइतबार दैलेखको राकममा सन्देश सभा गरेको थियो।
