सर्वोच्च अदालतको न्यायाधीशमा सिफारिस भएका ६ मध्ये तीन न्यायाधीशविरूद्ध संसदीय सुनुवाइ समितिमा उजुरी परेको छ।
सबभन्दा धेरै उजुरी सारंगा सुवेदीविरूद्ध परेको छ। उनीविरूद्ध पाँच उजुरी परेका छन्।
त्यस्तै, टेकप्रसाद ढुंगानाविरूद्ध तीन वटा र अब्दुल अजिज मुसलमानविरूद्ध एउटा उजुरी परेको छ।
उच्च अदालतको न्यायाधीश भइसकेकी सारंगा सुवेदीविरूद्ध माइतीघरमा छोरी आरती साहको हत्याको घटनामा न्याय माग्दै अनसन बसेका निर्मलादेवी साह र बिनोदप्रसाद साहले उजुरी दिएका छन्।
सारंगा सुवेदी र अर्का न्यायाधीश किरण पोखरेलको संयुक्त इजलासले निर्मला र बिनोदप्रसादले दिएको जाहेरीमा प्रमाण नपुगेको भन्दै आरतीका श्रीमान मोतीबाबु साह र ससुरा मदनमोहनलाई साधारण तारेखमा छाडिदिएको थियो। उक्त घटनाबारे सेतोपाटीसँगको कुराकानीमा अदालतका रजिष्ट्रार खड्गराज अधिकारीले 'घटना हत्या नभई आत्महत्याजस्तो देखिएकाले उनीहरूलाई साधारण तारेखममा छोड्ने' आदेश भएको बताएका थिए।
जेठ ७ गते, धनुषामा आरती साह श्रीमानको घरमा झुन्डिएको अवस्थामा भेटिएकी थिइन्। २२ वर्षकी आरती निर्मलादेवीकी छोरी हुन्।
आरतीको २०७८ असार ३० गते मिथिला बिहारी नगरपालिका-३ मिथिलेश्वर मौवाहीका मोतीबाबु साहसँग बिहे भएको थियो। बिहेपछि आरती परिवारसँगै जनकपुरधाम-८ थापाचोकमा बस्दै आएकी थिइन्।
माइती पक्षले आरतीको दाइजोको निहुँमा हत्या गरिएको बताउँदै आएको छ। तर आरतीको श्रीमान र ससुराले भने आरतीले आत्महत्या गरेको बताउँदै आएका छन्।
आरतीको मृत्युपछिको पोस्टमर्टम रिपोर्टमा झुण्डिएको हुन सक्ने लेखिएको छ। तर सँगै मृत्युको समय २४ देखि ३६ घण्टाअघि उल्लेख गरिएको छ। आरतीको परिवारले यसरी समय फरक पर्नुले हत्या गरेर आत्महत्या देखाउन खोजिएको बताउँदै आएको छ। साथै आरतीको परिवारले जिल्ला अदालतमा बयानमा आफूहरूले भनेको भन्दा फरक कुरा लेखेको बताएका थिए।
जिल्ला अदालतले थुनछेक बहसपछि आरतीका श्रीमान मोतीबाबु र ससुरा मदनमोहनलाई पुर्पक्षका लागि थुनामा पठाउने आदेश दिएको थियो। तर उच्च अदालतले उनीहरूलाई साधारण तारेखमा छाडिदिएको हो। यही मुद्दामा सर्वोच्च अदालतको न्यायधीशमा सिफारिस सारंगाविरूद्ध आरती साहका आमा र बुवाले उजुरी दिएका हुन्।
न्यायपरिषदले २०८० साल मंसिर ४ गते सर्वोच्चमा ६ जना न्यायाधीश पदका लागि सिफारिस गरेको थियो। न्यायाधीशमा सिफारिस भएका महेश शर्मा पौडेल, सुनीलकुमार पोखरेल र बालकृष्ण ढकालविरूद्ध उजुरी परेको छैन।
