सत्ता साझेदार दल एकीकृत समाजवादीको सचिवालय बैठक मंगलबार पनि बस्दै छ।
सचिवालयको ६९ औं बैठक मंगलबार बिहान ११ बजे पार्टी कार्यालयमा बस्ने उपाध्यक्ष राजेन्द्र पाण्डेले जानकारी दिए।
सोमबारबाट सुरू भएको बैठकमा महाधिवेशन सार्न प्रस्ताव गरिएको छ। यसअघि भदौ ५, ६, ७ मा ललितपुरको बालकुमारीमा बसेको केन्द्रीय कमिटीको बैठकले माघ १४ गतेबाट महाधिवेशन सुरू गर्ने निर्णय गरेको थियो। त्यसपछि बसेको सचिवालय बैठकले काठमाडौंमा महाधिवेशन गर्ने निर्णय गरेको थियो।
हिजोबाट सुरू भएको बैठकमा नेपाल कम्युनिस्ट पार्टी स्थापना दिवस (२२ अप्रिल) र मदन–आश्रित स्मृति दिवस जेठ ३ गते महाधिवेशन गर्ने गरी नयाँ मिति प्रस्ताव भएको पाण्डेले बताए।
‘महाधिवेशन सार्न प्रस्ताव आएको छ। आज बस्ने बैठकले त्यसबारे निर्णय गर्छ,’ उनले भने।
यसका अतिरिक्त राष्ट्रिय सभाको निर्वाृृचन र ज्येष्ठ कम्युनिस्ट मञ्च गठनबारे पनि छलफल गर्ने कार्यसूची रहेको छ।
एकीकृत समाजवादीले माघ ११ गते राष्ट्रिय सभाको निर्वाचन तय भएकाले पूर्वघोषित महाधिवेशनको मिति सार्न लागेको हो। फागुन २० गते राष्ट्रिय सभाका २० सांसदको पदावधि सकिँदैछ। त्यसको एक महिनाअघि नै निर्वाचन गर्नुपर्ने व्यवस्थाका कारण माघ ११ गते निर्वाचन हुन लागेको हो।
राष्ट्रिय सभामा एमालेबाट निर्वाचित भएका ८ सांसदको पदावधि सकिँदैछ। योसहित रिक्त २० स्थानमा सत्ता गठबन्धन दलले भागबन्डा गर्न लागेका छन्। यसबारे पनि आजको बैठकमा छलफल हुने पाण्डेले जानकारी दिए।