प्रधानमन्त्री पुष्पमकल दाहाल ‘प्रचण्ड’ले सेवामा सुधार भएन भने जनतालाई फिलोसोपी (दर्शन) र आइडोलोजी (विचार)को मतलब नहुने बताएका छन्।
बुधबार ललितपुरमा आयोजित नेपालको अर्थतन्त्र र शासकीय सुधारसम्बन्धी अन्तरक्रिया कार्यक्रममा बोल्दै प्रधानमन्त्री प्रचण्डले सेवा र विकासको आधारमा जनताले सरकारप्रति सन्तुष्टि वा असन्तुष्टि जाहेर गर्ने बताएका हुन्।
‘त्यही सन्तुष्टि र असन्तुष्टिमा राजनीतिक चलखेल हुने गर्दछ,’ उनले भने, ‘सरकारले सुशासन, सामाजिक न्याय र समृद्धिको लागि पूरै प्रयास जारी राखेको छ। तर जनता पूरै सन्तुष्ट हुने ठाउँमा पुगेका छैनन्। अर्थतन्त्र सुधारतर्फ उन्मुख त छ तर दबाबमुक्त भैसकेको छैन।’
प्रधानमन्त्रीले आफूले राष्ट्रिय र अन्तर्राष्ट्रिय रूपमा राष्ट्रको प्रतिष्ठा बढाउने जमर्को गरिरहेको पनि बताए।
‘तपाईंहरू खुलेर छलफल गर्नूस्, रणनीतिक र तात्कालीन रूपमा गर्ने कामको ठोस कार्यसूची तयार गर्नोस्। मलाई लाग्छ हाम्रो देशको ब्युरोक्रेसी संसारकै अब्बल छ, व्यवसायिक छ, दक्ष र अनुभवी छ तर परिणाम निकाल्ने कुरामा राजनीतिक नेतृत्व र ब्युरोक्रेसीबीचमा कहीँ न कहीँ अझै तादात्म्यता मिलेको छैन। त्यसलाई कसरी हल गर्ने ब्युरोक्रेसीको पूर्व र वर्तमान नेतृत्वले छलफल गरी निष्कर्ष पेश गर्नुहुनेछ,’ प्रधानमन्त्री प्रचण्डले भने।
प्रधानमन्त्रीले १५ औं योजनाको समीक्षा र १६ औं योजनाको तयारीको समयमा रहेको बताए।
‘आगामी वर्षको नीति तथा कार्यक्रम र बजेट निर्माणको समयमा छौँ। यो मौलिक कार्यक्रमले त्यसको लागि सरकारलाई मद्दत गर्नेछ भन्ने मैले विश्वास लिएको छु,’ उनले भने।
