नेकपा एमालेका अध्यक्ष केपी शर्मा ओलीले पोखरा र लुम्बिनी अन्तर्राष्ट्रिय विमानस्थल सञ्चालन गर्न सरकारले बेवास्ता गरेको बताएका छन्।
शनिबार मध्यपहाडी पुष्पलाल लोकमार्ग अभियानका क्रममा गोरखामा आयोजित अन्तरक्रिया कार्यक्रमलाई सम्बोधन गर्दै ओलीले सरकारले विमानस्थल सञ्चालनमा जोड दिनुपर्ने बताएका हुन्।
भित्रभित्रै विमानस्थल सञ्चालन गर्न पाउँदैनौं भनेपनि बाहिबाट कुनैपनि शक्तिले त्यसो भन्न नसक्ने ओलीले बताए।
‘विमानस्थल कसैले चलाउन पाउँदैनौ भनेर भित्र भनेको होला, बाहिर त भन्न सक्दैन नि,’ उनले भने।
विमानस्थल सञ्चालन गरेर चीनलाई मात्रै आग्रह गरेको खण्डमा वार्षिक पाँच देखि दस लाख पर्यटक त्यहाँबाट ल्याउन सकिने उनले बताए।
लुम्बिनी विमानस्थल चलाएको खण्डमा पनि हजारौं हजारको संख्यामा बुद्धिस्ट पर्यटकरहरु भित्र्याउन सकिने उनले बताए।
‘एयरपोर्ट बनेको छ, आफ्नै जमिनमा बनेको हो, आफ्नै जमिनबाट उडाउने र ल्याण्ड गर्ने हो । के समस्या छ ?,’ उनले भने।
अध्यक्ष ओलीले सरकारले सार्वभौम सत्ता, स्वाधिनताको र स्वतन्त्रताको उपयोग गर्ने हुति राख्नुपर्ने बताए। ‘लिम्पियाधुरा, लिपुलेक, कालापानीको प्रश्न, हाम्रा उच्चस्तरका वार्तामा समावेश हुन सक्दैन भने त्यो भन्दा देशप्रतिको बेइमानी के हुन्छ?,’ उनले भने।(न्युज एजेन्सी नेपालबाट)