माओवादी केन्द्रका उपमहासचिव हरिबोल गजुरेलले प्रधानमन्त्री पुष्पकमल दाहाल ‘प्रचण्ड’को प्रमुख राजनीतिक सल्लाहकारबाट राजीनामा दिएका छन्।
गजुरेलले मंसिर २० गते नै राजीनामा दिएका हुन्। तर, प्रधानमन्त्री तथा मन्त्रिपरिषद्को कार्यालयले स्वीकृत भने गरिसकेको छैन।
‘मंसिर २० गते नै राजीनामा दिएको हुँ। राजीनामाको कारणबारे राजीनामा पत्रमै उल्लेख गरेको छु। स्वीकृत भएपछि बताउने छु,’ उनले सेतोपाटीसँग भने।
राष्ट्रिय सभामा उम्मेदवारी दिन पो राजीनामा बुझाउनु भएको हो कि भन्ने सेतोपाटीको जिज्ञासामा उनले त्यता जान नचाहेको स्पष्ट पारे।
‘राष्ट्रिय सभातिर मेरो बिल्कुलै इच्छा छैन, बाँकी कुरा राजीनामा स्वीकृत भएपछि बताउनेछु,’ उनले भने।
उनी २०७९ माघ ९ गते प्रधानमन्त्री प्रचण्डको राजनीतिक सल्लाहकार नियुक्त भएका थिए।
