नेकपा (एमाले) का उपसमहासचिव प्रदीप ज्ञवालीले सरकारले युवा केन्द्रित कार्यक्रम नल्याए केही समयमै पहाडी क्षेत्र रित्तिने खतरा रहेको बताएका छन्।
शुक्रबार तेह्रथुमको बसन्तपुरमा न्युज एजेन्सी नेपालसँग कुराकानी गर्दै उपमहासचिव ज्ञवालीले युवा केन्द्रित कार्यक्रम ल्याउनुपर्ने बताए।
‘पहाडमा विकासका प्रचुर सम्भावना छन्। कृषि र कृषिजन्य उद्योगहरुको ठूलो सम्भावना पहाडी क्षेत्रमा छ, पर्यटनको भण्डार हो, जलस्रोतको भण्डार हो, खानीहरु छन्, यसलाई प्रयोग गर्ने गरी विकासका योजना बढाउनुपर्छ,’ ज्ञवालीले भने, ‘युवा केन्द्रित कार्यक्रम ल्याउन जरुरी देखियो। नभए बिस्तारै गाउँ-बस्ती युवाविहीन हुने अवस्था छ।’
विद्यालय कतिपय ठाउँमा रित्तिँदै गएको उनले बताए।
‘जलवायु परिवर्तनका असर बढी देख्यौँ। खोनपानीको मुहान सुक्ने, हिउँ पग्लिरहेको देख्यौँ। हिमालहरु कालो पहाड बन्दै गएको, ठूला पहिरो गएको छ। अन्य दलहरुलाई पनि राजधानीमा बसेर सत्ताको वाक्कदिक्क लाग्दो लुछाचुँडी र भागबण्डा छोडेर जनतामा आउनुस्। जनतामा ठूलो पीडा छ। सबैले स्वस्थ प्रतिस्पर्धा गरौं,’ ज्ञवालीले भने।
पार्टीले चलाएको अभियानले सम्बन्ध स्थानीय र सन्देश राष्ट्रिय रूपमा दिएको उनले बताए। ‘यस अवधिमा हामीले २९ वटा ठूला सभा गरेका छौँ। तेह्रथुमको वसन्तपुरसम्म आइपुग्दासम्म। सय भन्दा बढी साना भेलाहरु गरेका छौँ। विकास सम्बन्धी सर्वदलीय छलफलका कार्यक्रम गरेका छौँ,’ उनले भने।
यो समग्र कार्यक्रमबाट एमालेको जनतासँग सम्बन्ध निकट भएको र ७ देखि ८ लाख मानिससँग प्रत्यक्ष भेट भएको उनले बताए। अभियान सकिने बेलासम्म करिब २५ लाख मानिसहरूसँग संवाद गरिने उनले बताए।
‘एमालेको लोकप्रियता खस्किएको छ भन्ने भाष्य निर्माण गर्न जुन खोजिएको थियो, कमजोर बन्दैछ र एमालेलाई आधार बनाएर गणतन्त्रप्रति नै मान्छेको आस्था र विश्वास टुट्दैछ भन्ने खालका भ्रम यो यात्राले चिरेको छ। जनता आफ्ना जनप्रतिनिधिहरु नजिक भएको देख्न चाहने रहेछन्,’ उनले भने।
