नक्कली भुटानी शरणार्थी प्रकरणमा पुर्पक्षका लागि थुनामा रहेका पूर्वगृहमन्त्रीसमेत रहेका नेपाली कांग्रेसका केन्द्रीय सदस्य बालकृष्ण खाण शुक्रबार छुट्दैछन्।
बिहीबार उच्च अदालत पाटनका न्यायाधीश कृष्णराम कोइरालाले उनलाई धरौटीमा छाड्न आदेश दिएसँगै छुट्न लागेका हुन्।
उनको छुट्ने प्रक्रियाका लागि उच्च अदालतले जिल्ला अदालत काठमाडौंमा आइसकेको जिल्लाका सूचना अधिकारी दीपक दाहालले जानकारी दिए।
‘उच्च अदालतबाट मिसिल आइसकेको छ। उहाँको पनि कोही आफन्त आउनुभएको होला। बैंक ग्यारेण्टी बुझाएको भन्ने कुरा छ,’ उनले भने, ‘अब प्रक्रिया अघि बढ्छ। तारिखमा उपस्थित गराउनु भनेर कारागारलाई पत्र पठाउँछौं। तारेखमा बसेपछि उहाँ थुनामुक्त हुन्छ।’
न्यायाधीश कोइरालाले खाणलाई ३० लाख धरौटीमा छाड्न आदेश दिएका थिए। उनले उच्च अदालतकै न्यायाधीश जनक पाण्डेको रायलाई समर्थन गर्दै धरौटीमा छाड्न भनेका हुन्।
मंसिर १५ गते उच्चका न्यायाधीशहरू पाण्डे र प्रकाश खरेलबीच राय बाझिँदा कोइरालाको इजलासले निर्णय गरेको हो। प्रकाश खरेलले भने खाणलाई थुनामै राख्नुपर्ने भन्दै राय दिएका थिए।
उनलाई केन्द्रीय कारागार जगन्नाथदेवबाट सम्पत्ति शुद्धीकरण विभागमा उपस्थित गराइने सहायक जेलर मित्रलाल लुइँटेलले जानकारी दिए।
त्यहाँबाट फेरि अख्तियार दुरूपयोग अनुसन्धान आयोगमा लग्ने र त्यहाँबाट मात्रै छुट्ने उनले बताए।
बिहीबार आदेश अबेरमात्रै आएकाले उनको प्रक्रिया अघि बढ्न पाएको थिएन।
खरेल र पाण्डेको इजलासले भुटानी शरणार्थी नेता टेकनाथ रिजाललाई १५ लाख रुपैयाँ धरौटीमा छाड्न आदेश दिएको थियो। उनले धरौटी बुझाउन नसकेपछि थुनामै छन्।
उनीसँगै हज समितिका अध्यक्ष रहेका शमशेर मियाँलाई १० लाख रुपैयाँ, खाणका स्वकीय सचिव नरेन्द्र केसीलाई १० लाख रुपैयाँ, एमाले नेता टोप बहादुरका छोरा सन्दीपसँग ३० लाख रुपैयाँ, हरिभक्त महर्जनसँग १५ लाख र रामशरण केसीसँग १५ लाख रुपैयाँ धरौटीमा छाड्न आदेश दिएको हो। उनीहरू धरौटी बुझाएर छुटिसकेका छन्।
उच्चले लक्ष्मी महर्जन, टंक गुरूङ, केशव तुलाधर र आशिष बुढाथोकीलाई साधारण तारेखमा छाड्न अदालतले आदेश दिएको थियो।
नेपालीलाई नक्कली भुटानी शरणार्थी बनाएको आरोपमा थुनामा रहेका नेकपा (एमाले) का नेता टोपबहादुर रायमाझीलाई भने थुनामै राख्न आदेश दिएको थियो। पूर्वसचिव टेकनारायण पाण्डे, सानु भण्डारी, केशव दुलाल, इन्द्रजित राई, सागर राई, गोविन्द कुमार चौधरी, सन्देश शर्मा र आङटावा शेर्पालाई पनि थुनामै राख्न उच्च अदालत पाटनले आदेश दिएको हो।
नक्कली भुटानी शरणार्थी प्रकरणमा पक्राउ परेका २० जनाविरूद्ध ठगी, लिखत कीर्ते, राज्यविरूद्धको अपराध र संगठित अपराधमा गत जेठ १० गते काठमाडौं जिल्ला अदालतमा मुद्दा दर्ता भएको थियो।
अदालतले गत असार १ गते १७ जनालाई थुनामा पठाएर ३ जनालाई धरौटी माग गरेको थियो।
