नेपाली कांग्रेसले राष्ट्रिय सभा चुनावका लागि कम्तीमा १० सिट दाबी गर्ने तयारी गरेको छ।
शुक्रबार बसेको केन्द्रीय कार्यसम्पादन समितिको बैठकले कम्तीमा पनि १० सिट दाबी गर्नुपर्ने आवाज उठेको कार्यसम्पादन समितिका एक सदस्यले सेतोपाटीलाई बताए। तर यसबारे सत्ता गठबन्धनमा औपचारिक छलफल भइसकेको छैन।
माघ ११ गते राष्ट्रिय सभाको निर्वाचन हुँदैछ। सरकारको सिफारिसमा राष्ट्रपतिबाट मनोनीत भएका एक र १९ जना निर्वाचित सदस्यको फागुन २० गते पदावधि सकिँदैछ।
त्यसका लागि कांग्रेसले सातै प्रदेश कार्यसमितिलाई आकांक्षीहरू सिफारिस गर्न आग्रह गरेको समिति सदस्य आनन्द ढुंगानाले बताए। एक प्रदेशले तीन जना आकांक्षीहरूको नाम सिफारिस गर्न आग्रह गरेको छ।
प्रचार विभाग प्रमुख मीनबहादुर विश्वकर्माका अनुसार प्रदेशले ७ दिनभित्र उम्मेदवार सिफारिस गर्नुपर्छ। उम्मेदवार कस्तालाई सिफारिस गर्ने मापदण्डसहित केन्द्रीय कार्यालयले पत्राचार गर्ने पनि उनले बताए।
यस्तै पुस १२ गतेदेखि बस्ने गरी केन्द्रीय समितिको बैठक बोलाउने पनि निर्णय भएको छ। त्यही बेला राष्ट्रिय सभा चुनावमा उम्मेदवार चयन गर्न, अरू दलहरूसँगको गठबन्धन लगायत विषयमा छलफल हुने कांग्रेसले जनाएको छ।
कार्यसम्पादन समिति बैठकले महासमिति बैठक सार्ने निर्णय गरिसकेको छ।
महासमितिको बैठक फागुन ७ देखि १० गतेसम्म गर्न लागेको हो। यसअघि महासमितिको बैठक पुस १६ देखि १९ गतेसम्म गर्ने निर्णय थियो। उक्त बैठक राष्ट्रिय सभाको चुनाव र चिसोका कारण सार्ने निर्णय भएको हो।
