नेकपा (एमाले) का अध्यक्ष केपी शर्मा ओलीले योग्यलाई छाडेर त्रिवि उपकुलपतिको अल्पसूची (सर्टलिस्ट) निकालिएको बताएका छन्।
त्रिवि उपकुलपतिका लागि ४३ जनाले आवेदन दिएकोमा एक जनाको रद्द भएको थियो। आवेदन स्वीकृत भएकामध्ये १४ जना अल्पसूचीमा परेका थिए।
अल्पसूचीमा परेकाहरूले प्रस्तुतीकरण दिनेलगायत प्रक्रिया चलिरहेको छ।
अध्यक्ष ओलीले यसअघि नै असफल भइसकेका र अनुचित क्रियाकलाप गरेकाहरूलाई समेटेर त्रिवि उपकुलपति सर्टलिस्ट प्रकाशित गरिएको आरोप लगाएका छन्।
‘प्रधानमन्त्रीजीले अस्ती नै दुई/चार पटक खोक्नुभयो, गज्जबसँग खोक्नुभयो। अब विश्वविद्यालयमा मेरिटोक्रेसी लगाइन्छ, दलीय आधारमा हुँदैन भनेर। खोकेको भन्छन् के यसलाई, कुराले खोकेको नि!,’ अनेरास्ववियुले च्यासलमा बुधबार गरेको कार्यक्रममा ओलीले भने, ‘अहिले जुन सर्टलिस्ट उहाँहरूले बनाउनुभएको छ, योग्यजतिलाई छाड्नुभएको छ।’
गठबन्धनले अनुचित काम गरेकाहरूलाई उपकुलपति बनाउन खोजेको उनको भनाइ छ।
‘गठबन्धनका आसेपासे, अयोग्य सावित भइसकेका, यस्ता ठाउँमा जिम्मेवारी दिन नहुने भनिएकालाई सर्टलिस्टमा राखेर मेरिटोक्रेसी त पहिलै देखियो,’ ओलीले भने, ‘ती छानिएका मानिसहरूलाई केही भन्नु छैन उनीहरूले यसैगरी पहिलेदेखि खाइआएकै हुन्।’
कोही त्रिविमै, कोही पोखरा विश्वविद्यालयमा असफल भइसकेकाहरूलाई सर्टलिस्टमा राखिएको उनले आरोप लगाएका थिए। ‘नयाँ मान्छे जन्मिएकै छैन जस्तो गरी पोखरामै असफल भएका, त्रिविमै असफल भएकालाई फेरि सर्टलिस्टमा राखियो,’ उनले भने।
उनले उपकुलपति छनोट तथा सिफारिस समितिमाथि पनि प्रश्न उठाए।
‘मेरिटोक्रेसीको गफ दिएर हिँडेकै बेला प्रधानमन्त्रीलाई भनेको थिएँ- तपाईंले छनोट समितिबाट बनाउने भन्नु भएको छ। छनोट समितिचाहिँ कस्तो हुन्छ,’ ओलीद्ये भने, ‘आफ्नै मानिस राखेर छनोट समिति बनाउने अनि नाटक मञ्चन गर्ने?’
प्रधानमन्त्री पुष्पकमल दाहाल प्रचण्डले त्रिवि पदाधिकारी नियुक्तिमा अबदेखि राजनीतिक भागबन्डा नहुने र मेरिटका आधारमा नियुक्त गरिने बताएका थिए। त्रिविमा गत कात्तिक १६ गतेदेखि उपकुलपति रिक्त भएको थियो। कुलपतिसमेत रहेका प्रधानमन्त्री दाहालले प्रा.डा. शिवलाल भुसाललाई निमित्त उपकुलपतिको जिम्मेवारी दिएका छन्।
यो पनि:
शिक्षा समितिले भन्यो- विवादित व्यक्तिहरू त्रिवि उपकुलपति सर्टलिस्टमा परे, पुनर्विचार गर्नू
बौद्धिक चोरीमा परेका कांग्रेसनिकट पूर्वउपकुलपति खनियाँ फेरि त्रिविको सर्टलिस्टमा
निमित्त उपकुलपति भुसाललाई प्रश्न- नयाँ नेतृत्व नआउँदै किन गर्नुभयो भागबन्डामा नियुक्ति?
चार पूर्वउपकुलपतिहरूको भनाइ
त्रिवि उपकुलपतिका लागि आवेदन दिएका ४३ जनाबाट १४ जनाको नाम छनोट
त्रिवि उपकुलपति नियुक्तिमा ढिलाइ, भुसाललाई नै निरन्तरता
त्रिवि उपकुलपतिका लागि ४३ जनाले दिए आवेदन
संसारको कुनै पनि कुनामा रहेका योग्य नेपालीले उपकुलपतिमा दाबी गर्न सक्छन्, राजनीतिक भागबन्डा हुन्न: प्रधानमन्त्री
