नेपाली कांग्रेसको महासमिति बैठक सोमबारदेखि सुरू हुँदैछ।
सभापति शेरबहादुर देउवाले सोमबार दिउँसो १ बजे महासमिति बैठक उद्घाटन गर्ने कार्यक्रम छ।
प्रचार विभाग प्रमुख मीनबहादुर विश्वकर्माले महासमिति बैठक तयारी अन्तिम चरणमा पुगेको जानकारी दिए। ललितपुरको गोदावरीस्थित सनराइज हलमा महासमिति बैठक फागुन १० गतेसम्म चल्नेछ।
महासमितिमा सहभागी भएका सदस्यमध्ये कम्तीमा ६० प्रतिशतलाई बोल्न समय दिइने विश्वकर्माको भनाइ छ।
बैठकमा उपसभापति पूर्णबहादुर खड्काले नीति, महामन्त्री गगन थापाले सांगठनिक, अर्का महामन्त्री विश्वप्रकाश शर्माले समसामयिक राजनीतिक, प्रवक्तासमेत रहेका अर्थमन्त्री प्रकाशशरण महतले नेपालको वर्तमान आर्थिक अवस्था, सम्भावना र भावी दिशा तथा लेखा समिति संयोजक श्यामकुमार घिमिरेले लेखा परीक्षण प्रतिवेदन पेश गर्नेछन्।
‘यी प्रस्तावहरूमाथि चार वटा समूह बनाएर छलफल गरिनेछ,’ प्रचार विभाग प्रमुख विश्वकर्माले गोदावरीमा आइतबार आयोजित पत्रकार सम्मेलनमा भने, ‘हिमाल, पहाड र तराईको प्रतिनिधित्व हुने गरी समूह बनाइनेछ।’
महासमिति बैठकले कांग्रेसले लिने नीति तय गर्नेछ।
महासमिति बैठकमा वर्तमान पदाधिकारी तथा केन्द्रीय सदस्यहरू १६५ जना, प्रतिनिधि सभा क्षेत्रबाट प्रतिनिधित्व हुने गरी महासमिति सदस्यहरू १ हजार सात सय ८० जना, नेपाली जनसम्पर्क समितिबाट ८९ जना, भ्रातृ तथा शुभेच्छुक संस्थाबाट ६९ जना, महासमिति सदस्य नरहेका जिल्ला सभापति ४६ जना सहभागी हुने विश्वकर्माले जानकारी दिए।
यो पनि: महासमितिमा पेश गर्ने गगन र विश्वप्रकाशको प्रस्तावका कतिपय कुरामा देउवाको आपत्ति
