नेपाली कांग्रेसका केन्द्रीय सदस्य अर्जुननरसिंह केसीले ५ सय र हजारको नोट प्रतिबन्ध गर्ने आँट गर्नुपर्ने बताएका छन्।
बुधबार ललितपुरको गोदावरीस्थित सनराइज सम्मेलन हलमा जारी कांग्रेस महासमिति बैठकमा उनले १४ बुँदे धारणा राख्दै ५ सय र हजारको नोट प्रतिबन्ध गर्ने आँट गर्नुपर्ने बताएका हुन्।
उनले देशको मुद्रालाई कालोधनको माध्यम बन्न नदिन विमुद्रीकरण गर्नुपर्ने बताएका हुन्। त्यसका लागि सरकार तयार हुनुपर्ने उनको भनाइ थियो। यसको नेतृत्व पनि नेपाली कांग्रेसले गर्ने आँट गर्नुपर्ने बताएका हुन्।
‘माफिया, बिचौलिया, कालोधनका धनपतिहरूले सत्तामा पकड जमाएका छन् भन्ने आम विश्वास छ। देशको मुद्रालाई कालोधनको माध्यम बन्न नदिन विमुद्रीकरण गर्नुपर्ने आवश्यकता छ। त्यसैले एक हजार र पाँच सयका नोटमा प्रतिबन्ध लगाउनेसम्मको कदम चलाउन सरकार तयार हुनुपर्छ र कांग्रेसले नै यसको नेतृत्व लिने आँट गर्नुपर्छ,’ उनले भने।
राजनीतिमा लागेका व्यक्तिहरूले बोराका बोरा पैसा लुकाएर राखेको भन्ने जनतामा भ्रमपूर्ण सन्देश पुर्याइएको पनि उनले बताए।
‘राजनीतिमा लागेका हामीजस्ता व्यक्तिहरूले बोराका बोरा पैसा लुकाएर राखेका छन्। कोठाभरि पैसाको गोदाम नै बनाएका छन् भन्ने जनतामा भ्रमपूर्ण सन्देश पुर्याइएको छ,’ उनले भने।
गोदावरीमा सोमबारदेखि जारी कांग्रेस महासमिति बैठक बिहीबार सकिँदैछ।
उपसभापति पूर्णबहादुर खड्का, महामन्त्रीद्वय विश्वप्रकाश शर्मा र गगन थापा, पार्टी प्रवक्ता प्रकाशशरण लगायतले मंगलबार पेस गरेका प्रस्तावमाथि समूहगत रूपमा छलफल जारी छ।
अहिले चार वटा समूह बनाएर छलफल भइरहेको हो। महासमिति सदस्यहरूलाई उक्त विषयका छलफलका लागि ५ मिनेट दिइएको छ।
साउन १ देखि पाँच सय, हजारका नोट चलेनन् भने!
