नेकपा एमालेले प्रतिपक्षले उठाएका प्रश्नहरूको जवाफ दिनुपर्छ भनेर प्रधानमन्त्री पुष्पकमल दाहाल प्रचण्डले संसद छलिरहेको आरोप लगाएको छ। आइतबार प्रतिनिधि सभाको बैठकमा एमालेले यस्तो बताएको हो।
बैठकमा एमालेका प्रमुख सचेतक पदम गिरीले भौतिक पूर्वाधारमन्त्री प्रकाश ज्वाला, स्वास्थ्य तथा जनसंख्यामन्त्री मोहनबहादुर बस्नेत, संस्कृति, पर्यटन तथा नागरिकमन्त्री सुदन किराँती र उपप्रधान एवं गृहमन्त्री नारायणकाजी श्रेष्ठको राजीनामा माग गरे।
उनले बालकुमारी घटनामा दोषी देखिएका मन्त्री प्रकाश ज्वाला, युवामाथि गोली प्रहार गर्न आदेश दिने गृहमन्त्री श्रेष्ठ, अख्तियारको छानबिनमा रहनुभएका स्वास्थ्यमन्त्री बस्नेत र रामग्रामको जग्गा भाडामा लगाउने विवादास्पद निर्णय गर्ने पर्यटनमन्त्री किराँतीले तत्काल राजीनामा दिन आवश्यक रहेको बताए।
उनले नेकपा एमालेले फागुन ६ गतेदेखिका बैठकमा सरकारको जवाफ माग गरे पनि सरकारले बेवास्ता गरिरहेको बताए।
‘हामी गत ६ गतेदेखि संसदमा बालकुमारी घटनाका दोषी भौतिकमन्त्री र बालकुमारी घटनामा गोली ठोक्न् आदेश दिने गृहमन्त्रीको बिरुद्धमा आवाज उठाइरहेका छौं। अख्तियारको छानबिनमा रहेका स्वास्थ्यमन्त्री मन्त्री पदमा बस्न मिल्दैन, उहाँको राजीनामा मागिरहेका छौं। रामग्राम लिजमा दिने पर्यटनमन्त्रीको राजीनामा मागिरहेका छौं,’ प्रमुख सचेतक गिरीले भने, ‘हामीले संसदमा हप्तौ दिनदेखि कुरा उठाउँदा सरकार सुन्न तयार छैन। प्रधानमन्त्रीले जवाफ दिनुपर्ने ठाउँमा बाहिर हिँडिरहनुभएको छ।’
उनले सरकारले बलिमिच्याईं गरेर अघि बढ्दा माग सम्बोधन हुन नसकेको बताए।
