नेपाली कांग्रेसका सांसद रामहरि खतिवडाले १८ करोड कमिसन खाने लोभमा नयाँ जहाज खरिद् प्रक्रिया अघि बढाइएको बताएका छन्।
आइतबार प्रतिनिधि सभाको बैठकमा बोल्दै सांसद खतिवडाले ट्विनअटर क्यानेडियाबाट तीनवटा ट्विनअटर किन्ने निर्णय गरिएको तर ती कम्पनीले ती जहाज बनाउनै छाडिसकेको बताएका हुन्।
‘ट्विनअटर क्यानेडियाबाट तीनवटा ट्विनअटर किन्ने निर्णय गरिएको छ। नेपाल वायुसेवा निगमको आफ्नै समितिले अहिले हामीले ल्याउन सक्ने अवस्था छैन, यी जहाजहरू उत्पादन हुन छोडिसकेका छन् भन्दा टेन्डर एक महिनाअगाडि लागू गरिसकिएको छ। ‘रिपोर्ट अनक्वालिफाइड’ भनेर समितिले भनिसकेको छ। जुन जहाजहरू अहिले उत्पादनमा छैनन्। ३०० जी भन्ने जहाज ल्याइँदैछ, जुन अहिले उत्पादनमा छैन। त्यसमा ल्याएर झन्डै १८ करोड नेपाली रुपैयाँ कमिसन खाने खेलमा लागिएको सूचना प्राप्त भएको छ,’ उनले भने।
नेपाल एयरलाइन्सलाई झन्डै ३१ अर्ब रुपैयाँ नेपाल सरकारले लगानी गरेको उनले तथ्यांक प्रस्तुत गरे। निगम अहिले ४८ अर्ब रुपैयाँभन्दा बढी घाटामा रहेको पनि उनले बताए।
‘सावाँको त कुरै छाडौं, चार वर्षदेखि ब्याजसमेत तिर्न सकेको छैन। वाइडबडी र न्यारोबडीको ३४ अर्ब रुपैयाँको ब्याज अहिलेसम्म तिर्न सकेको छैन, जुन सञ्चय कोष र नागरिक लगानी कोषबाट लिइएको छ। निगममा भएको चारवटा जहाजमध्ये दुईवटा न्यारो बडी र दुईवटा वाइडबडी अहिले घाटामा छन्। निगमलाई आन्तरिक उडानका लागि ६ वटा चिनियाँ जहाज लिइएको थियो, ती छ वटा चिनियाँ जहाज वाइ–१२ र एम–१६ तत्कालीन अवस्थामा झन्डै आठ अर्ब रुपैयाँमा लिइएको जहाज अहिले लिलाममा राख्दा ३८ करोड रुपैयाँमा बिक्री हुन सकेको छैन। एउटा ट्विनअटर बिग्रिएर १० वर्षदेखि थन्किएर ग्राउन्डेड भएर रहेको छ। निगममा १२ सय स्थायी र आउट सोर्सिङ गरे झन्डै ८ सय कर्मचारी छन्।
अहिले पनि भर्खरै वर्तमान पर्यटन मन्त्रीले ६२ जना नयाँ कर्मचारीहरूलाई करार र ज्यालादारीमा नियुक्ति गरेर राखिएको छ। जसको हाजिर गरेर कहाँ जाने, कहाँ आउने, के गर्ने थाहा छैन। हाजिर गरेर हिँडे पुग्ने गरी राखिएको छ। यी तथ्यांकका बाबजुद पनि पर्यटनमन्त्री नयाँ जहाज किन्नुपर्यो भनेर हिँड्नुभएको छ,’ उनले भने।
तै पनि मन्त्री असाध्यै सुधार गर्न लागेको आभास मिलेको भन्दै कटाक्ष गरे। झाडु र क्यामेरा लिएर मन्त्रालय प्रवेश गरेर फोटो खिचेर बाहिर ल्याउने पद्धतिको विकास भएको उनले कथन छ।
‘यसरी मुलुक कहाँ जाने हो? सस्तो लोकप्रियताका लागि, आफ्नो मन्त्रालयको कार्यकक्ष सफा गर्न टिभी लिएर पुगेर त्यो भिडियो हालिदिएपछि सबैभन्दा क्रान्तिकारी र राम्रो मन्त्री हुने हो भने मुलुक कसरी विकास हुन्छ? सरकारले सुशासनका नाममा लारक्याल लामा जस्ता मानिसलाई नियुक्ति गरेको छ, लुम्बिनी विकास कोषमा। शान्तिको दूत गौतम बुद्धको ठाउँमा लकरमा गोली राख्ने मानिसलाई नियुक्त गरेपछि देशको हालत के होला? मैले सत्तारूढ दल र प्रतिपक्षी दलको रूपमा यसलाई हेरेको होइन, नेपालका मन्त्रीहरूले व्यक्तिगत स्वार्थ हेर्न थाले भने मुलक कहाँ जान्छ? कामका आधारमा होइन, दामका आधारमा नियुक्ति हुन थाले, यसमा घोर आपत्ति छ!,’ उनले भने।