कालिकोटमा रहेको सुनथराली विमानस्थल उद्घाटन गरिएको छ।
सोमबार उपप्रधान तथा रक्षामन्त्री पूर्णबहादुर खड्काले विमानस्थल उद्घाटन गरेका हुन्।
उनले कर्णालीमा चुनावी सभाहरूमा गरेका प्रतिबद्धताहरू पूरा हुँदै गएको बताए।
निर्वाचनका बेला प्रधानमन्त्री पुष्पकमल दाहाल प्रचण्ड र आफूले कालिकोटमा बोलेको कुरामध्ये एउटा काम पूरा भएको खड्काले बताए।
उनकाअनुसार नेपाल एयरलाइन्सको जहाजले सातामा एक दिन सुनथराली विमानस्थलमा उडान भर्नेछ।
कालिकोटका नागरिकलाई यातायातमा सहज हुने गरी तीनै तहका सरकारले समन्वय गर्ने पनि उपप्रधानमन्त्री खड्काले बताए।
उपप्रधानमन्त्री खड्काले हरेक बजेटमा कर्णालीलाई प्राथमिकता दिएको भन्दै यहाँको समस्याबारे आफू जानकार रहेकाे बताएका थिए।
शिक्षा, स्वास्थ र पूर्वाधारको विकासमा सबै दलहरू एकजुट हुनुपर्नेमा खड्काको भनाइ छ।
‘कर्णालीको विकासमा राजनीति गर्न हुँदैन। सबै मिलेर कर्णालीको विकासमा हातेमालो गरौं। कर्णाली राजमार्ग, भेरी करिडोर, मुगुका प्रमुख सडकहरू निर्माण गर्नेदेखि विद्युत् उत्पादनका क्षेत्रका कामहरूमा पनि सबैले हातेमालो भएर लाग्नुपर्छ,’ उनले भने।
उपप्रधानमन्त्री खड्काले कालिकोटको शिक्षा, स्वास्थ्य, पूर्वाधार र यातायाततर्फकाे विकासमा सबै दल एकजुट हुनुपर्ने बताए।
'कालिकोटको विकासकाे लागि केन्द्र सरकारकाे तर्फबाट पहल गरिरहेकाे छु, कालिकोटका पर्यटकीय क्षेत्रकाे विकासको लागि र कर्णाली प्रदेशको विकासको लागि नेपाल सरकारले एक किसिमको खाका तयार गरेको छ,' उनले भने।
मुलुकमा विमानस्थल कम भए पनि जहाजको सेवा कालिकोटका गरिब जनता, सुत्केरी महिला र बृद्धबृद्धाहरूकाे लागि सहयोगी हुने उनको भनाइ छ।
कालिकोटको पर्यटन, कृषि र अन्य विकासमा सरकारले सहयोग गरिरहेकाे उनले बताए। १०–१५ वर्षमा कर्णालीलाई समृद्ध प्रदेश बनाउन सकिने बताउँदै उनले त्यसका लागि सबैले मिलेर काम गर्नुपर्नेमा जोड दिए।
पर्यटन मन्त्री सुदन किराती, मुख्यमन्त्री राजकुमार शर्मा, पूर्वमुख्यमन्त्री महेन्द्रबहादुर शाही र पूर्वमुख्यमन्त्री जीवनबहादुर शाहीलगायत कार्यक्रममा सहभागी थिए।
तस्बिरहरू:
सबै तस्बिरहरू: उपप्रधानमन्त्री खड्काको सचिवालय।
