नेकपा (माओवादी केन्द्र) का उपमहासचिव जनार्दन शर्माले राष्ट्रिय सभाको अध्यक्ष माओवादी केन्द्रबाटै हुने बताएका छन्।
नयाँ बानेश्वरमा सोमबार पत्रकारहरूसँग कुराकानी गर्दै शर्माले राष्ट्रिय सभाको ठूलो दलको हैसियतमा अध्यक्षमा माओवादीको दाबी रहने बताए।
‘राष्ट्रिय सभामा माओवादी सबैभन्दा ठूलो दल हो, उसले अध्यक्षमा दाबी नगरे कसले गर्छ?,’ शर्माले प्रश्न गरे, ‘गठबन्धन दलहरूका बीचमा अध्यक्ष कसलाई दिने भन्नेमा कुनै सहमति भएको छैन।’
उनले आलोपालो प्रधानमन्त्री बन्ने समझदारीअनुसार पछि संवैधानिक परिषदमा माओवादीको कोही पनि नहुने अवस्था देखिएकोले राष्ट्रिय सभा अध्यक्षमा दाबी गरिएको बताए।
फरक प्रसंगमा उनले नेपाली कांग्रेसले महासमिति बैठकमा पेश गरेका प्रस्तावमा 'जनयुद्ध' लगायत कतिपय विषयमा प्रश्न गरेकाले त्यसबारे आफूहरूको आपत्ति रहेको पनि बताए।
(न्युज एजेन्सी नेपाल)
