प्रधानमन्त्री पुष्पकमल दाहाल प्रचण्डले संसद र संसदीय समितिले दिएको निर्देशनहरूलाई सरकारले उच्च महत्व दिई प्राथमिकताका साथ कार्यान्वयन गर्दै आएको बताएका छन्।
बुधबार संघीय संसद राष्ट्रिय सभा अन्तर्गतको राष्ट्रिय सरोकार तथा समन्वय समितिको बैठकमा बोल्दै उनले समितिमा उठेका प्रश्नहरूलाई सरकारले गम्भीर रूपमा लिएको बताएका हुन्।
‘संसद र संसदीय समितिले दिएको निर्देशनहरूलाई सरकारले उच्च महत्व दिई प्राथमिकताका साथ कार्यान्वयन गर्दै आएको व्यहोरा पनि जानकारी गराउन चाहन्छु,’ उनले भने, ‘समितिमा माननीय सदस्यहरूले व्यक्त गरेका जिज्ञासाहरूमा पनि सरकारको धारणा तपाईंहरूले उचित रूपले उठाएका प्रश्नहरूलाई सरकारले गम्भीर रूपले लिने नै छ।’
उनले सरकारले भ्रष्टाचार नियन्त्रण, सुशासन, समृद्धि, विकास र सन्तुलित परराष्ट्र नीति कायम गर्ने कुरामा मुख्य जोड दिँदै आएको बताए।
प्रधानमन्त्री प्रचण्डले सरकारले संघीयता कार्यान्वयनका लागि बाँकी कानूनहरूको निर्माण कार्यलाई अघि बढाएको पनि बताए।
‘संघीयता कार्यान्वयनका सरकारको उच्च प्राथमिकतामा छ। यस सन्दर्भमा विगत ४ वर्षदेखि नसकेको संघ, प्रदेश र स्थानीय तह समन्वय तथा अन्तरसम्बन्ध ऐन बमोजिम गठन गरिएको प्रदेश समन्वय परिषदको बैठक यसैपटक दुई पटक बसी संघीयताको कार्यान्वयनको सम्बन्धमा भएको विभिन्न निर्णयहरू कार्यान्वयन भइरहेका छन्,’ उनले भने।
-न्युज एजेन्सी नेपाल
-ink-1709107453.jpeg)
