सभामुख देवराज घिमिरेले सरकारलाई आगामी बैठकमा उपस्थित भएर सांसदहरूले उठाएका विषयमा जवाफ दिन निर्देशन दिएका छन्।
शुक्रबार बसेको बैठकमा प्रतिपक्षी दलहरूले सरकार संसदप्रति जवाफदेही नभएको भन्दै विरोध जनाएपछि सभामुख घिमिरले फागुन २१ गते बस्ने बैठकमा सरकारलाई उपस्थित हुन रूलिङ गरेका हुन्।
आजको बैठक सुरू हुनासाथ प्रमुख प्रतिपक्षी दल एमाले र राप्रपा लगायतका प्रतिपक्षी दलका सांसदहरूले उठेर विरोध जनाएका थिए।
त्यसपछि सभामुख घिमिरेले एमाले सांसद सूर्य थापालाई बोल्न दिए। थापाले बालकुमारी घटनाबारे संसदलाई जवाफ दिन सभामुखले पटकपटक रूलिङ गर्दा पनि प्रधानमन्त्री संसदमा उपस्थित भएर जवाफ नदिएको बताए।
‘१४ गतेको बैठकमा सभामुखले आगामी बैठकमा प्रधानमन्त्रीले जवाफ दिने भन्नेबारे रुलिङ गर्नुभएको थियो। प्रधानमन्त्रीको खोजी गर्नुपर्यो, मन्त्रीको खोजी गर्नुपर्यो र सरकारलाई संसदप्रति जवाफदेखि बनाउनुर्यो,’थापाले भने।
सरकारले जवाफ नदिएसम्म संसद अघि नबढ्ने उनले बताए।
त्यसपछि राप्रपा संसदीय दलका नेता राजेन्द्र लिङ्देनले बोलेका थिए।
उनले मिटरब्याजी पीडित काठमाडौं आएको, सहकारी पीडितहरू लामो समयदेखि आन्दोलनमा रहेकोदेखि लघुवित्त पीडिहरू संसद भवनभित्र सम्मै पुगेको र दूग्ध उत्पादक कृषकहरू सडकमै रहेको बताए।
ती सबै विषयमा सरकार आँखा भएर पनि नदेख्ने, कान भएर नसुन्ने बहिरो भएर बसेको लिङ्देनले बताए।
‘संसदमा हामी केबल आवाज उठाएर र कुरा गरेर मात्रै बस्ने यसको अर्थ हुँदैन। सरकारले ठोस जवाफ नदिएसम्म र सरकारको उपस्थिति संसदमा नभएसम्म संसद अगाडि बढाइराख्न कुनै अर्थ छैन,’ लिङ्देनले भने।
त्यसपछि विपक्षी दलका सबै सांसदहरू उठे।
सभामुख घिमिरेले ती विषयहरू आइसकेको र सरकारलाई निर्देशन गरिसकेकाले आसन ग्रहण गर्न आग्रह गरे। प्रतिपक्षी सांसदहरूले विरोध जारी राखेपछि सभामुख घिमिरेले फागुन २१ गते बस्ने बैठकमा सरकारलाई उपस्थित हुन रूलिङ गर्न भनेका हुन्।
‘सांसदहरूले उठाएको विषयका सम्बन्धमा यसअघिका बैठकहरूमा सरकारलाई बैठकमा उपस्थित भई जवाफ दिन स्पष्ट निर्देशन गरिसकिएको ब्यहोरा जानकारी गराउँछु। आजको बैठकमा पनि विभिन्न विषयहरूका सम्बन्धमा सरकारको ध्यानाकर्षण गराउँदै जवाफको माग गर्नुभएको छ। आज र यसघि उठेका विषयहरूमा सभाको फागुन २१ गते बस्ने बैठकमा उपस्थित भई जवाफ दिन नेपाल सरकारलाई निर्देश गर्दछु,’ सभामुख घिमिरेले निर्देशन दिए।
सभामुखको रूलिङपछि संसद बैठक अगाडि बढेको छ।
