राष्ट्रिय प्रजातन्त्र पार्टी (राप्रपा) का सांसद राजेन्द्र लिङ्देनले संसद बैठक कर्मकाण्डको लागि मात्रै चलाइराख्नुको औचित्य नभएको बताएका छन्।
शुक्रवार प्रतिनिधि सभा बैठकमा बोल्दै राप्रपा अध्यक्षसमेत रहेका लिङदेनले जनताको समस्याहरुको ठोस समाधान गर्ने सरकारको जवाफ नआएसम्म कर्मकाण्डको लागि मात्रै संसद चलाइराख्नुको कुनै औचित्य नभएको बताए।
उनले मिटरब्याज, लघुवित्त र सहकारी पीडितहरुको समस्या समाधानमा सरकार जिम्मेवार हुनुपर्ने बताए।
व्यवसायीको समस्या, रसियन सेनामा नेपाली भर्ती भएका विषय संसदमा चर्को रुपमा उठे पनि सरकारले नसुनेको उनको भनाइ थियो।
संसदमा उठेका आवाज सरकारले नसुने संसदमा बोल्नुको कुनै अर्थ नभएको उनले बताए।
‘सरकार आँखा भएर पनि नदेख्ने, कान भएर पनि नसुन्ने अन्धो र बहिरो भएर बसेको अवस्था छ। रसियन सेनामा भर्ती भएका अन्य देशका नागरिकहरू लाई अन्य देशले फिर्ता ल्यायो। हाम्रो सरकार फिर्ता ल्याउने पहल गर्नु त परै जाओस्। परिवारलाई भेट्ने, सान्त्वना दिने अवस्थामा पनि छैन। संसदमा हामीले आवाज उठाएर मात्रै बस्ने, कुरा गरेर मात्रै बस्ने यसको अर्थ के हुन्छ?,’ उनले भने।
सरकारले यी विषयमा ठोस जवाफ दिनुपर्ने उनले बताए।
‘सरकारको उपस्थिति संसदमा नभएसम्म संसद अगाडि बढाइराख्नुको कुनै औचित्य छैन। केबल कर्मकाण्डको लागि मात्रै यो संसद चलाइराख्नु र जनताले रगत, पसिना बगाएर तिरेको तिरोमाथि रमाइलो गरेर बस्नुको कुनै औचित्य छैन। ठोस जवाफ नआएसम्म संसद अगाडी बढ्दैन,’ उनले भने।
(न्युज एजेन्सी नेपाल)
