राष्ट्रपति रामचन्द्र पौडेलले भजन शिरोमणि वरिष्ठ गायक तथा सङ्गीतकार भक्तराज आचार्यको स्वरमा रहेको गाम्भीर्य, मिठास तथा शास्त्रीयताको जादु अद्भूत र अनुपम भएको बताएका छन्।
राष्ट्रपति पौडेलले स्वर्गीय आचार्यको परिवारलाई शुक्रबार समवेदना सन्देश पठाउँदै भनेका छन्, ‘भजनशिरोमणिको उपाधि पाउनुभएका भक्तराज नेपाली गीतसङ्गीतको आकाशमा बिर्सनै नसक्ने नाम हो, जसको स्वरको गाम्भीर्य, मिठास तथा शास्त्रीयताको जादु अद्भूत तथा अनुपम थियो।’
शास्त्रीय सङ्गीतको तत्त्वलाई आधुनिक गीतसङ्गीतमा मिश्रण गर्ने भक्तराजको क्षमताले यो क्षेत्रमा बेग्लै पहिचान बनेको राष्ट्रपतिको भनाइ छ।
‘कैयौँ भजन, देशभक्ति, आधुनिक र बालगीतमा स्वर तथा सङ्गीत दिएर नेपाली गीतसङ्गीतलाई विशिष्ट उचाइमा पुर्याउन उहाँले पुर्याउनुुभएको योगदान अतुलनीय छ’, समवेदना सन्देशमा भनिएको छ।
कालजयी र कर्णप्रिय गीतले गीतसङ्गीतप्रेमीमाझ मात्र नभई नेपालीको मनमस्तिष्कमा उनलाई जीवन्त राखिरहने उल्लेख गर्दै राष्ट्रपति पौडेलले सन्देशमा आचार्यको निधनले नेपाली गीतसङ्गीतको क्षेत्रमा अपूरणीय क्षति पुगेको बताएका छन्।
राष्ट्रपतिको समवेदना सन्देश उनकी छोरी सुपुत्री अवज्ञा पौडेल र प्रेस सल्लाहकार किरण पोखरेलले आचार्यका परिवारजनलाई प्रदान गरेका थिए।
