कर्णाली प्रदेशको प्रथम महिला सम्मेलन सुरू भएको छ।
११४ औं अन्तर्राष्ट्रिय महिला दिवसको अवसर पारेर सोमबारदेखि प्रथम कर्णाली प्रदेश महिला सम्मेलन आयोजना गरिएको हो।
वीरेन्द्रनगर नगरपालिकाले आयोजना गरेको प्रदेश महिला सम्मेलनको नारा ‘महिलामा लगानीः सभ्य र सम्मुनत समाजको थालनी’ राखिएको छ।
सम्मेलनको उद्घाटन पूर्वराष्ट्रपति विद्यादेवी भण्डारीले गरेकी छन्। सम्मेलन उद्घाटन सत्र र सामूहिक छलफल गरी दुई चरणमा चल्नेछ।
कर्णालीका सम्भावना, असर र चुनौतीको विषयलाई उजागर गर्न प्रथम महिला सम्मेलनले विशेष भूमिका खेल्ने वीरेन्द्रनगर नगरपालिकाका प्रमुख मोहनमाया भण्डारीले बताइन्।
कर्णालीको विकासका लागि सबैको साझा बुझाइ बनाउन सम्मेलनको भूमिका रहने उनले बताइन्।
‘विकासमा लैंगिक समावेशिता आजको आवश्यकता हो, सरकारले बनाउने योजनामा लैंगिक समावेशिता आवश्यक छ, सम्मेलनले यो विषयमा वकालत गर्ने अपेक्षा गरिएको छ,’ मेयर भण्डारीले भनिन्।
स्थानीय तहले बनाउने नीतिहरू पूर्णरूपमा समावेशी हुनुपर्ने साझा बुझाइ स्थापित गर्न सम्मेलन कोशेढुंगा बन्ने अपेक्षा गरिएको उनले बताइन्।
सम्मेलनको दोस्रो सत्रमा सामूहिक छलफल गरिने र त्यसबाट निस्किएका निश्कर्षका आधारमा सुर्खेत घोषणापत्र जारी गरिनेछ। सामूहिक छलफलका लागि अवधारणापत्र तयार पारिएको छ।
