गत बुधबार साँझ सुन्धारामा भएको घटनामा प्रहरीले जाहेरी लिन नमानेको सडक व्यापारीहरूले बताएका छन्।
आफूहरूमाथि अमानवीय ढंगले कुटपिट गरेको घटनामा प्रहरीले जाहेरी लिन नमानेको स्वरोजगार व्यापार संघकी माया गुरूङले बताइन्।
उनका अनुसार जाहेरीको शीर्षक प्रहरीलाई चित्त नबुझेपछि दर्ता गर्न नमानिएको हो।
'सुरूमा जाहेरी दिन कालिमाटी प्रहरी कार्यालय गएका थियौं,' उनले सेतोपाटीसँग भनिन्, 'घटना जहाँ भएको हो, त्यहीँ जाहेरी दर्ता गराउनू भनेपछि प्रहरी वृत जनसेवा गयौं। तर त्यहाँ पनि हाम्रो जाहेरी लिन मानिएको छैन।'
आफूहरूविरूद्ध भएको अन्यायको जाहेरी दिन तीन दिनदेखि धाइरहँदा पनि प्रहरीले लिन नमानेको उनको भनाइ छ।
'त्यहाँका डिएसपीले हाकिम साहेब भएका बेला जाहेरी दिन आउन भन्नुहुन्छ,' उनले भनिन्, 'तपाईंले लिन मिल्छ नि भनेर सांगठनिक रूपमा ज्यान मार्ने उद्योगमा जाहेरी दर्ता गर्न भन्यौं। तर उहाँले मान्नुभएन। सामान्य कुटपिट गरेको कसुरमा भए मात्र दर्ता गर्छु, नत्र गर्दिनँ भन्नुभयो।'
जाहेरी कुन शीर्षकमा हुनुपर्छ भन्नेबारे निर्क्यौल गर्न सरकारी वकिलको कार्यालयले हेर्न सक्ने भएकाले सोही मुद्दामा दर्ता गर्न आग्रह गर्दा पनि इन्कार गरेको उनले बताइन्।
'आज (सोमबार) पनि गएका थियौं,' गुरूङले भनिन्, 'तर हामी गएको केही समयअगाडि डिएसपी निस्किएका रहेछन्। त्यसपछि हाम्रो जाहेरी लिन मिल्दैन भनेर फर्काउनुभयो।'
डिएसपी भेषराज रिजाललाई हामीले यसबारे सोध्न सम्पर्क गर्दा सुरूमा उनको फोन उठेको थिएन। पछि उनीसँग हाम्रो सम्पर्क भयो र हामीले जाहेरी लिन किन नमानिएको भनेर सोध्यौं।
उनले व्यवसायीहरू शुक्रबार भने के गर्ने भनेर कुरा गर्न मात्र आएको र त्यसपछि सल्लाह गरेर जाहेरी दिन आउने भन्दै फर्केको बताए।
'उहाँहरूको जाहेरी नलिने भन्ने हुँदैन,' रिजालले भने, 'हाम्रो क्षेत्राधिकार पर्ने कुरालाई हामीले बेवास्ता गर्न मिल्दैन।'
हामीले जनसेवाका प्रवक्ता एसपी नवराज अधिकारीलाई पनि यसबारे सोधेका थियौं। अधिकारीले आफूलाई यस घटनाबारे नै जानकारी नभएको बताए।
'यो विषय के हो भन्ने मलाई थाहा छैन,' उनले भने, 'भोलि बुझेर खबर गर्छु।'
यो पनिः
