नेपाली कांग्रेसले पूर्ण अशक्त अपाङ्गता भएकाहरूमाथि प्रहरीले धरपकड गरेको भन्दै विरोध गरेको छ।
दीपक भण्डारीको नेतृत्वमा अपाङ्गता भएका व्यक्तिहरूले बुधबार रत्नपार्कमा गरेको सडक आन्दोलनमा प्रहरीले हस्तक्षेप गरेको कांग्रेसको भनाइ छ।
सामुदायिक सहायता सेवामा उल्लेख भएको व्यक्तिगत सहयोगीको माग गर्दै विगत दुई सातादेखि रत्नपार्कमा अपाङ्गता भएका व्यक्तिहरुले धर्ना, अनसन र सडक आन्दोलन गरिरहेका छन्।
बुधबार भएको आन्दोलनमा प्रहरीले दमन र धरपकड गरेको थियो।
‘धरपकडमा अपाङ्गता भएका केही व्यक्तिहरु घाइते भएका छन्। आन्दोलन संयोजक विकास थापालगायत करिब २४ जना अपाङ्गता भएका व्यक्तिहरु पक्राउ परेका छन्। अपाङ्गता भएका व्यक्तिहरुको संवेदनशीलतामाथि ख्यालै नगरी भएको यस प्रकारको दमन र धरपकडको कांग्रेस घोर भत्सर्ना र निन्दा गर्दछ,’ मुख्यसचिव कृष्णप्रसाद पौडेलले जारी गरेको विज्ञप्तिमा उल्लेख छ।
केही महिना अघि दीपक भण्डारीसहित अपाङ्गता भएका व्यक्तिहरूको धर्ना र आन्दोलनपछि नेपाल सरकार महिला, बालबालिका तथा जेष्ठ नागरिक मन्त्रालयले सहमति गरिसकेको सहयोगी तथा सामुदायिक सेवासम्बन्धी व्यवस्था कार्यान्वयनको माग गर्दै दुई सातादेखि आन्दोलन चलिरहेको थियो।
‘नेपाल सरकार आफैले सहमति गरेको तर कार्यान्वयन नगरेको सन्दर्भमा कार्यान्वयनको माग गर्दै अनिश्चितकालिन अनसनमा रहेका अपाङ्गता भएका व्यक्तिको न्यायोचित माग तत्काल सम्बोधन गरी जीवन रक्षा गर्न, शान्तिपूर्ण सडक आन्दोलनका क्रममा पक्राउ परेका अपाङ्गता भएका व्यक्तिलाई तत्काल रिहाइ गर्न र घाइतेको स्वास्थ्योपचारको व्यवस्था गर्न कांग्रेस सरकारसँग माग गर्दछ,’ विज्ञप्तिमा भनिएको छ।
