प्रधानमन्त्री प्रचण्डले सहकारी पीडितलाई कालो झण्डा देखाएर ‘ब्लण्डर’ गरेको बताएका छन्। पोखरा सभागृहमा कार्यकर्ता प्रशिक्षणमा बोल्दै उनले ५ लाख भन्दा कम बचत भएका सहकारी पीडितलाई फिर्ता दिन सरकारले बजेटमै ल्याएको बताए।
‘५ लाख भन्दा कम बचत भएकालाई पैसा दिने भनेर सरकारले बजेटमै योजना ल्याएकवो छ। त्यहाँ बाहिर कालोझण्डा देखाउनुभयो। कालो झण्डा देखाउनुहुने साथीले ब्लण्डर गर्नुभयो। यस्तो बुद्धितिर नलाग्नुहोला, तपाइहरुको पक्षको सरकारलाई,’ उनले भने।
पोखराका सूर्यदर्शन बचत तथा ऋण सहकारी संस्थाका पीडितले बुधबार प्रधानमन्त्री प्रचण्डलाई कालो झण्डा देखाएका थिए। सहकारी पीडित २ वर्षदेखि आन्दोलनमा रहँदा पनि सरकारले कुनै चासो नदिएको भन्दै उनीहरुले कालो झण्डा देखाएका हुन्।
सहकारी बचत पीडित संघर्ष समिति कास्कीका संयोजक किरण श्रेष्ठले सरकारले सधै आश्वासन मात्र दिने तर काम नगर्ने भएकाले विरोध जनाउनुपरेको बताए।
पीडितले यसअघि प्रधानमन्त्री प्रचण्डलाई ज्ञापन पत्र बुझाउँदै सहकारी ठगीमा संलग्नलाई कारबाही गर्न र बचत फिर्ता गर्न माग राखेका थिए।
प्रधानमन्त्रीको विरोधमा आन्दोलनमा उत्रिएका ११ जना पीडितलाई पक्राउ गरेको प्रहरीले जनाएको छ।
मन्तव्यका क्रममा प्रधानमन्त्री प्रचण्डले अहिले सरकारले ल्याएको बजेट इतिहासकै राम्रो भएको पनि दाबी गरे। एमालेले बजेटमा केही असन्तुष्टी जनाएको भन्दै उनले अहिले राम्रो वातावरण बनेको बताए। बजेट कांग्रेसलाई पनि मन परेको उनले दाबी गरे।
‘बजेट कांग्रेस भित्रका धेरैलाई मन परेको छ। भोट त हाल्नुहुन्न होला तर मन परेको छ। राम्रो काम गरेर जनताको विश्वास जितने हो भने राम्रो गर्न सकिन्छ,’ उनले भने।
-1746009348.jpg)
