तनहुँको व्यास नगरपालिकाको मेयर पदको पुन:मतगणना असार २ गते बिहान १० बजे सुरू गर्न उच्च अदालत पोखराको आदेश पुनरावेदन गर्न सर्वोच्च अदालतमा निवेदन परेको छ।
व्यासमा निर्वाचित भएका मेयर वैकुण्ठनाथ न्यौपानेले बिहीबार पुनरावेदन दिएको सर्वोच्च अदालतका सूचना अधिकारी गोविन्दप्रसाद घिमिरेले जानकारी दिए।
उक्त निवेदन दर्ता भएको र जेठ २७ गतेका लागि पेशी तोकिएको छ।
उच्च अदालत पोखराका न्यायाधीशहरू राजनप्रसाद भट्टराई र निर्मला पौडेल भट्टराईको संयुक्त इजलासले व्यास नगरपालिकाको पुन: मतगणना जेठ १ गते फैसला गरेको थियो। उक्त फैसलाको जेठ ११ गते पूर्णपाठ आएको थियो।
पूर्णपाठमा पुनः मतगणना सकिएपछि प्रतिवेदन इजलासमा पेश गर्न पनि आदेश दिइएको छ।
स्थानीय तहको २०७९ वैशाख ३० गते भएको निर्वाचनमा व्यास नगरपालिकाको मेयर पदको मतगणनामा धाँधली भएको भन्दै उम्मेदवार दीपकराज जोशीले उच्च अदालतमा रिट दायर गरे थिए। पुनः मतगणना गरी पाऊँ भनी उनले दिएको रिट निवेदनमा उक्त फैसला भएको हो।
नेपाली कांग्रेसका पूर्वनेता गोविन्दराज जोशीका छोरा दीपकराजले कैंची चुनाव चिह्न लिएर मेयर पदमा चुनाव लडेका थिए। उनलाई एमालेले समर्थन गरेको थियो। चुनावमा कांग्रेस उम्मेदवार बैकुण्ठनाथ न्यौपानेले २ सय ५२ मतान्तरले निर्वाचन जितेका थिए।
अदालतको आदेशको पूर्णपाठ आएसँगै मेयर न्यौपाने सर्वोच्च अदालत गएका हुन्। मतगणना क्रममा उम्मेदवार जोशीले पुनः मतगणना गर्न कुनै निवेदन नदिएको र आफू निर्वाचित भएपछि बधाई दिएको भन्दै अब फेरि मतगणना गर्नु कानुन विपरीत हुने उनको जिकिर छ।
