नेकपा (एकीकृत समाजवादी) का महासचिव घनश्याम भुषालले नेकपा (एमाले) र नेकपा (माओवादी केन्द्र) ले नेपालमा समाजवाद ल्याउन नसक्ने बताएका छन्।
काठमाडौंमा आइतबार नेपालमा समाजवादी क्रान्ति विषयक अन्तरक्रियामा बोल्दै उनले एमाले समाजवादी क्रान्ति ल्याउन बनेको पार्टी नभएको दाबी गरे।
एमाले व्यक्ति पूजामा अझै केही समय अल्झिरहने उनको भनाइ छ।
‘यो सारा क्रान्ति एमालेले गर्दैन किनभने त्यो नगर्नका लागि बनेको पार्टी हो, त्यो एक हिसावले व्यक्ति पूजा। आगामी दिनमा व्यक्ति पूजाको अझै ठूलो प्रयत्न गर्नेछ,’ उनले भने, ‘यसका विरुद्धमा प्रयत्न हुनेछ र यही वरपर लाग्नेछ।’
यस्तै माओवादी केन्द्रको समाजवादी क्रान्ति ल्याउने उमेर नपुगेको र बुझ्न अझै धेरै समय लाग्ने उनी बताउँछन्।
‘माओवादीले यो कुरा बुझ्न अझै धेरै समय लाग्छ। उसको त्यो हिसाबले सिद्धान्त बुझ्ने उमेर भएको छैन,’ उनले भने, ‘माओवादीको उमेर पुगेको छैन। उसले धेरै समय लगाउँछ। हाम्रो यो सानो पार्टी नेकपा (एकीकृत समाजवादी) का काँधमा ठूलो र गम्भीर जिम्मेवारी छ।’
(न्युज एजेन्सी नेपाल)
