रूसी राष्ट्रपति भ्लादिमिर पुटिनले युद्ध रोक्न नमानेर उल्टै युक्रेनमाथि भिषण आक्रमण गर्न थालेपछि दिक्क भएर अमेरिकी राष्ट्रपति डोनाल्ड ट्रम्पले रूसमाथि नयाँ प्रतिबन्ध लगाउने देखिएको छ।
पुटिनले पछिल्ला दिनमा युक्रेनको राजधानी किभ लगायत अन्य सहरमा आक्रमण तीव्र बनाएपछि ट्रम्पले कडा कदम चाल्ने संकेत देखिएको हो।
नयाँ बैंकिङ प्रतिबन्धहरू नलगाए पनि पुटिनलाई दबाब दिन अन्य विकल्पहरूबारे ट्रम्पले छलफल गरिरहेको भनेर त्यसबारे जानकार केही अधिकारीहरूको हवाला दिँदै द वाल स्ट्रिट जर्नलले लेखेको छ।
ट्रम्पले आइतबार सार्वजनिक रूपमै रूसमाथि नयाँ प्रतिबन्धहरूको सम्भावना रहेको बताएका थिए।
पछिल्लो समय पुटिन 'पागल' भएको भन्दै उनले मिसाइल र ड्रोन युक्रेनी सहरहरूमा प्रहार गरेर अनावश्यक रूपमा मानिसहरू मारिरेहको ट्रम्पले औंल्याएका थिए।
‘उनले धेरै मानिसहरूलाई मारिरहेका छन्। मलाई थाहा छैन उनलाई के भएको छ,’ ट्रम्पले पुटिनको बारेमा भनेका थिए।
यसरी पुटिनले युद्ध नरोकेर उल्टै युक्रेनमाथि आक्रमण तीव्र बनाएपछि आजित भएर ट्रम्पले रूसमाथि नयाँ प्रतिबन्ध लगाउने छलफल थालेका हुन्।
अमेरिकी राष्ट्रपति ट्रम्पले रूसी समकक्षी पुटिनसँग मे १९ मा फोनमा कुरा गरेपछि युद्ध रोकिने धेरैले अपेक्षा गरेका थिए। तर ट्रम्पले दुई घण्टा फोनमा कुरा गरे पनि पुटिनलाई युक्रेनसँगको युद्ध रोक्न मनाउन सकेनन् र रूसले युक्रेनमा तत्काल युद्धविराम घोषणा गर्नुपर्ने आफ्नो मागबाट ट्रम्प पछि हटे। त्यसपछि रूसले युक्रेनमाथि आक्रमण झन् तीव्र बनाएको छ। त्यसपछि युरोपियन युनियनले (इयु) रूसमाथि नयाँ प्रतिबन्धको प्याकेज घोषणा गरेको छ।
रूस-युक्रेन युद्धविरामको मध्यस्थता अमेरिकाले गरिरहेको छ। ट्रम्पले सार्वजनिक रूपमा र निजी रूपमा युद्धविरामका लागि दुवै देशलाई दबाब दिँदै आएका छन्।
अमेरिकाको मध्यस्थतामा साउदी अरबमा अमेरिकी अधिकारीहरूले रूसी र युक्रेनी अधिकारीहरूसँग छुट्टाछुट्टै वार्ता गरेका थिए। तर ती वार्ताहरूबाट हल ननिस्किएपछि मध्यपूर्व हेर्ने ट्रम्पका विशेष दूत स्टिभ विटकफले पटक-पटक पुटिनसँग लामा छलफल गरेर युद्धविराम सहमतिका लागि प्रयत्न गरेका थिए। तर सफल हुन सकेको छैन।
यसअघि अमेरिकाले युक्रेनमा ३० दिनको अस्थायी युद्धविराम गर्ने प्रस्ताव युक्रेनले सहजै स्वीकार गरे पनि पुटिनले सहमति दिएका थिएनन्।
पुटिनले युक्रेनलाई नेटोमा आबद्ध गर्न नहुने, सेना सीमित गर्ने र अहिलेसम्म रूसले कब्जा गरेको युक्रेनी भूभाग मात्र नभएर आफ्नो नियन्त्रणमा नभएका भागहरूको पनि स्वामित्व हुनुपर्ने माग गरिरहेका थिए।
पुटिन युद्धविरामका लागि तयार नभए रूसमाथि प्रतिबन्ध कडा बनाउँदै लैजाने ट्रम्पले चेतावनी समेत दिएका थिए। तर युरोपेली मुलुकहरूले रूसमाथि थप प्रतिबन्ध लगाए पनि ट्रम्पले भने त्यसो गरेका थिएनन्। पुटिनले युद्ध रोक्ने इच्छा नदेखाएर पछिल्ला दिनमा उल्टै युक्रेनमाथि हमला तीव्र बनाएपछि अब भने ट्रम्पले पनि रूसमाथि थप प्रतिबन्ध लगाउने छलफल थालेका हुन्।
(विभिन्न अन्तर्राष्ट्रिय सञ्चार माध्यमहरूको सहयोगमा तयार पारिएको)
