नेपाली कांग्रेसका महामन्त्री प्रदीप पौडेलले मधेसका समस्या र आवश्यकतालाई सम्बोधन गर्ने गरी पार्टीको एजेण्डा तथा योजना निर्माण गर्नुपर्ने बताएका छन्।
बिहीबार जनकपुरमा आयोजित कार्यक्रममा बोल्दै उनले मधेसको आवश्यकता र समस्या यहाँकै नागरिकले बढी बुझ्ने भएकाले स्थानीयस्तरबाट आएका सुझाव, मुद्दा र एजेण्डालाई नेपाली कांग्रेसको केन्द्रीय योजनामा समेट्नुपर्ने बताए।
उनले पार्टीका कार्यक्रम र योजनाहरू जनताको वास्तविक आवश्यकतासँग जोडिनुपर्ने उल्लेख गर्दै मधेसका मुद्दालाई राष्ट्रिय राजनीतिको प्राथमिकतामा राख्नुपर्ने धारणा राखे।
महामन्त्री पौडेलले नेपाली कांग्रेसका सभापति गगनकुमार थापालाई सरकारले पक्राउ गर्नसक्ने भन्दै विधिको शासन र कानूनी प्रक्रियामाथि प्रश्न उठाए।
सरकारले कानून र विधिको शासन पालना नगरेको अवस्थामा आफूहरू पक्राउ पर्न सक्ने सम्भावनालाई अस्वीकार गर्न नसकिने उनको भनाइ छ।
सभापति गगनकुमार थापाबारे एक विचौलियाले दिएको भनिएको बयानमा समेत प्रश्न उठाउँदै उनले सम्बन्धित व्यक्तिले प्रहरीसमक्ष त्यस्तो बयान दिएको भए प्रहरीले त्यसबारे सार्वजनिक गरिसक्ने र सरकारले अदालतमा मुद्दा लैजान यति ढिलाइ नगर्ने तर्क गरे।
सरकारले कसैलाई कारबाही गर्ने नाममा विधि र कानुनविपरीत मानमर्दन गर्न नहुने भन्दै उहाँले काँग्रेस यस्ता गतिविधिबाट नडराउने बताए।
पक्राउ गरे पनि सरकारका गलत काम र विधि उल्लंघनविरूद्ध आवाज उठाउन नछाड्ने उनको भनाइ छ।
उनले भने, ‘हाम्रो योजना र कार्यक्रम यस क्षेत्रका वास्तविक आवश्यकता, समस्या र जनताको अपेक्षासँग जोडिनुपर्छ। यस भूमिलाई नजिकबाट बुझ्ने स्थानीय साथीहरूले उठाएका मुद्दालाई समेटेर मधेसका समस्या र आवश्यकतालाई नेपाली काँग्रेसको केन्द्रिय एजेण्डा बनाउनुपर्छ। जहाँसम्म पार्टी सभापतिको पक्राउको विषय छ, हामी विधिको शासन र कानूनी प्रक्रियाको सम्मान गर्छौँ। तर कानूनको नाममा हुने राजनीतिक प्रतिशोध, मनपरी गिरफ्तारी र व्यक्तिको मानमर्दन स्वीकार्य हुँदैन। कुनैपनि आरोपको निष्पक्ष छानबिन र कानूनी प्रक्रियाबाट निरूपण हुनुपर्छ। दुई तिहाइको बहुमत पाउँदैमा सरकारले जे गरे पनि हुन्छ भन्ने सोच लोकतन्त्रको मर्मविपरित छ। सरकारका गलत काम, अन्याय र विधिको उल्लंघनविरूद्ध बोल्नु प्रतिपक्षको जिम्मेवारी हो। पक्राउ र दबाबले नेपाली कााँग्रेसको आवाज रोकिँदैन। हामी कानुनी शासन, लोकतान्त्रिक मूल्य र जनताको अधिकारका पक्षमा निरन्तर बोलिरहनेछौँ।’
दुई तिहाइको बहुमत प्राप्त गर्दैमा सरकारले जे गरे पनि हुन्छ भन्ने सोच राख्न नहुने उल्लेख गर्दै पौडेलले बहुमतका नाममा सरकारविरूद्ध बोल्नेहरूलाई डर र त्रास सिर्जना गर्ने प्रयास भइरहेको आरोप लगाए।
सरकारका गलत काम र गतिविधिबारे बोल्न कांग्रेस र पार्टी सभापति पछि नहटेको भन्दै उनले अहिले कांग्रेसमाथि भइरहेको व्यवहार पनि सरकारको यही प्रवृत्तिको परिणाम भएको टिप्पणी गरे। –न्युज एजेन्सी नेपाल
