भ्रष्टाचार मुद्दामा पेरूका पूर्वराष्ट्रपति मार्टिन भिज्कारालाई १४ वर्ष जेल सजायको फैसला भएको छ।
भिज्कारालाई राष्ट्रपति बन्नु अगाडिकै भ्रष्टाचार मुद्दामा १४ वर्षको सजाय सुनाएको हो।
सन् २०११ देखि २०१४ सम्म दक्षिणी क्षेत्र मोकिगुआका गभर्नर रहँदा उनले सार्वजनिक निर्माण ठेक्काका लागि निर्माण कम्पनीहरूबाट करिब ६ लाख ७६ हजार अमेरिकी डलर बराबरको घुस लिएको अदालतको ठहर छ।
यो फैसलासँगै भ्रष्टाचार अभियोगमा जेल जाने पेरूका पूर्व नेताहरूको सूची थप लामो बनेको भनेर अन्तर्राष्ट्रिय समाचार संस्था रोयटर्सले जनाएको छ।
गत अक्टोबरबाट सुरु भएको मुद्दाको सुनुवाइभर भिस्कार्राले आफ्नामाथि लगाइएका अभियोग अस्वीकार गर्दै आफू राजनीतिक प्रतिशोधको सिकार भएको दाबी गर्दै आएका थिए।
उनी सन् २०१८ मा आफ्नो पूर्ववर्तीकै राजीनामापछि राष्ट्रपति बनेका थिए। भ्रष्टाचार अनुसन्धानकै बीच सन् २०२० मा संसदबाट पदच्युत भएका थिए। सजाय सुनाइएपछि सामाजिक सञ्जाल ‘एक्स’ मा प्रतिक्रिया दिँदै उनले 'यो न्याय होइन, बदला हो' भनेका छन्।
अदालतको फैसलाले भिस्कारालाई ९ वर्षका लागि कुनै पनि सार्वजनिक पद धारण गर्न रोक लगाएको छ। उनका कानुनी सल्लाहकारले फैसलाविरुद्ध अपिल दर्ता गरिएको पुष्टि गरेका छन्।
यसैबीच उनका दाजु मारिओ भिज्काराले सन् २०२६ को अप्रिलमा हुने राष्ट्रपति निर्वाचनमा ‘पेरु फर्स्ट’ पार्टीबाट उम्मेदवारी दिने तयारी गरिरहेका छन्।
भिस्कार्रा सोही पार्टीका प्रमुख सल्लाहकार पनि हुन्।
सजायपछि भिस्कार्रालाई लिमास्थित सोही कारागारमा राखिने अपेक्षा गरिएको छ। त्यहाँ यसअघि नै तीन पूर्वराष्ट्रपति थुनिएका छन्।
पूर्वराष्ट्रपतिहरू अलेजान्द्रो टोलेडो र ओलान्ता हुमाला भ्रष्टाचार मुद्दामा सजाय काटिरहेका छन् भने पूर्वराष्ट्रपति पेड्रो क्यास्टिलो विद्रोहसम्बन्धी अभियोगमा पुर्पक्षका लागि थुनामा छन्।
पेरू सन् २०१८ यता बारम्बारको महाभियोग, राजीनामा र भ्रष्टाचार काण्डका कारण राजनीतिक अस्थिरतामा फसेको छ।
सो अवधिमा देशले छ जना राष्ट्रपति फेरिसकेको छ, जसले मुलुकको राजनीतिक संकटलाई अझ गहिरो बनाएको छ।
-1746009348.jpg)
