विश्वबहादुर शाह नेपाली सेनाका पूर्वमेजर हुन्।
अहिले उनी अमेरिकाको न्यु ह्याम्पसायर राज्यको प्रतिनिधिसभा सदस्यका लागि चुनावी प्रतिस्पर्धामा छन्।
डेमोक्रेटिक पार्टीका तर्फबाट उम्मेदवार बनेका शाहले हिल्सबरो काउन्टी डिस्ट्रिक्ट–४१ बाट पहिलोपटक चुनाव लड्न लागेका हुन्।
यस क्षेत्रबाट तीन जना प्रतिनिधि निर्वाचित हुनेछन्।
डेमोक्रेटिक र रिपब्लिकन पार्टीका तीन–तीन जना उम्मेदवार प्रतिस्पर्धामा रहेको विश्वबहादुरले जानकारी दिए।
उनले आफ्नो उम्मेदवारीलाई नेपालीसहित विभिन्न अल्पसंख्यक समुदायको प्रतिनिधित्वसँग जोडेका छन्।
उनका अनुसार अमेरिकामा विभिन्न देशबाट आएका समुदायलाई राजनीतिक दलहरूले मतदाताका रूपमा मात्र हेर्ने गरेका छन्। तर ती समुदायको आवाज पनि राज्यको संसदमा पुग्नुपर्ने उनको धारणा छ।
'हामी पनि यहाँ छौँ र नेपाली समुदाय पनि अमेरिकी समाजको एउटा हिस्सा हो भन्ने प्रतिनिधित्व गराउन चुनाव लडेको हुँ,' उनले भने।
समुदायको प्रतिनिधित्वसँगै शाहले आफ्नो निर्वाचन क्षेत्रका स्थानीय समस्यालाई पनि चुनावी मुद्दा बनाएका छन्।
तीमध्ये आवास, शिक्षा र ज्येष्ठ नागरिकको आर्थिक अवस्था प्रमुख रहेको उनले बताए।
उनका अनुसार त्यहाँ घर पाउन सहज छैन। घर पाए पनि त्यसको खर्च धान्न धेरैलाई कठिन छ।
शिक्षा क्षेत्रमा पनि सार्वजनिक विद्यालयले निजी विद्यालयको तुलनामा पर्याप्त बजेट पाउन सकेका छैनन्।
शिक्षकले पाउनुपर्ने सुविधा पनि पर्याप्त नभएको उनको भनाइ छ।
त्यस्तै, ज्येष्ठ नागरिकको आम्दानी नबढ्ने तर घरजग्गा कर तिर्नुपर्ने अवस्थाले उनीहरूलाई आर्थिक भार थपेको उनले बताए।
सीमित आम्दानीबाट घरको कर तिर्नुका साथै दैनिक जीवन चलाउनुपर्ने भएकाले उनीहरूलाई करमा छुट दिनुपर्ने उनको धारणा छ।
न्यून आम्दानी भएका अन्य नागरिकलाई पनि करमा राहत दिनुपर्ने उनले बताए।
'ज्येष्ठ नागरिकको आम्दानी बढ्दैन, तर त्यही सीमित आम्दानीबाट घरको कर तिर्नुपर्ने र आफ्नो जीवनयापन पनि गर्नुपर्ने हुन्छ। त्यसैले उनीहरूलाई करमा छुट दिनुका साथै न्यून आम्दानी भएका नागरिकलाई पनि सहयोग गर्नुपर्छ भन्ने मेरो जोड छ,' उनले भने।
अहिले अमेरिकी राजनीतिमा सक्रिय शाहको पृष्ठभूमि भने सैनिक सेवासँग जोडिएको छ।
तनहुँ पुर्ख्यौली घर भएका उनले बुटवल हाइस्कुलबाट विद्यालय शिक्षा पूरा गरेका हुन्।
त्यसपछि उच्च शिक्षा अध्ययनका लागि काठमाडौं आए र पुल्चोक क्याम्पसबाट सिभिल इन्जिनियरिङमा प्रमाणपत्र तह पूरा गरे।
पढाइ सकेपछि उनी नेपाली सेनामा सेकेन्ड लेफ्टिनेन्टका रूपमा प्रवेश गरे। सेनाको इन्जिनियर्स बटालियनमा रहेर विभिन्न सडक तथा पुल निर्माणका काममा संलग्न भएको उनले बताए।
यसरी १५ वर्ष सैनिक सेवामा बिताएका शाहले मेजर पदमा रहँदै जागिर छाडे।
सन् २००२ मा श्रीमतीको स्वास्थ्यमा समस्या आएपछि उनी जाँच गराउन अमेरिका पुगेका थिए। त्यसपछि उनी उतै बस्न थाले।
'श्रीमतीको स्वास्थ्यमा समस्या आयो। त्यसपछि जाँचका लागि अमेरिका आएँ र यतै बस्न थालेँ,' उनले सुनाए।
अमेरिका पुगेपछि उनको जीवनले नयाँ मोड लियो।
सुरूमा न्युयोर्कको एउटा स्यान्डविच रेस्टुरेन्टमा काम पाए।
त्यहाँ करिब दुई वर्ष स्यान्डविच बनाएर बिताएपछि उबर चालक बने।
त्यसपछि न्युयोर्क लाइफ इन्स्योरेन्स र रियल इस्टेट एजेन्टका रूपमा पनि काम गरे।
आफू विभिन्न काममा संलग्न भइरहँदा उनले नेपाली समुदायसँगको सम्बन्धलाई पनि निरन्तरता दिए।
अमेरिकामा नेपाली समुदायको पहिचान स्थापित गर्न सञ्चारमाध्यम आवश्यक ठानेर 'नयाँ नेपाल खबर' नामको नेपाली पत्रिका प्रकाशन सुरू गरे।
त्यतिबेला सामाजिक सञ्जाल अहिलेको जस्तो सक्रिय नभएकाले सूचना पुऱ्याउन सञ्चार माध्यम खोलेको उनको भनाइ छ।
केही समय पत्रिका प्रकाशन गरेपछि उनी फेरि व्यवसायमा फर्किए।
सन् २०१३ मा आफ्नै लगानीमा सबवे स्यान्डविच रेस्टुरेन्टको फ्रेन्चाइज लिएर सञ्चालन गरे।
तर, भाडा महँगो भएकाले व्यवसाय राम्रोसँग चल्न सकेन।
अन्ततः सन् २०१८ मा रेस्टुरेन्ट बन्द गर्नुपरेको उनले बताए।
व्यवसाय सञ्चालन गरिरहेकै बेला उनको राजनीतिक सक्रियता पनि सुरू भइसकेको थियो।
सन् २०१६ मा न्युयोर्कमा रहँदा उनी बर्नी स्यान्डर्सको चुनावी अभियानमा स्वयंसेवकका रूपमा सहभागी भएका थिए।
त्यसपछि डेमोक्रेटिक पार्टीमा आबद्ध भए।
न्युयोर्कमा लामो समय बिताएका विश्वबहादुर सन् २०१९ मा न्यु ह्याम्पसायर सरे।
अहिले उनी त्यहाँको म्यानचेस्टरमा बस्छन्। न्यु ह्याम्पसायर आएपछि उनी स्वास्थ्य सेवासम्बन्धी काममा आबद्ध भए।
अपांगता भएका वयस्क व्यक्तिलाई आवासीय सुविधा उपलब्ध गराउने काम गर्दै आएका उनले यस क्षेत्रमा सात वर्ष बिताइसकेका छन्।
'अपांगता भएका वयस्क व्यक्तिलाई आवासीय सुविधा उपलब्ध गराउने काम गर्दै आएको छु। त्यस्ता व्यक्तिको हेरचाह गरेबापत राज्यले सेवा प्रदायकलाई रकम उपलब्ध गराउने व्यवस्था छ,' उनले बताए।
अमेरिकामा विभिन्न काम र व्यवसायको अनुभव लिएका शाह अहिले त्यहीँको राजनीतिमा प्रतिनिधित्व खोजिरहेका छन्।
पार्टीका स्थानीय नेताहरूको आग्रह र आफ्नै राजनीतिक रुचिका कारण यसपटक राज्य प्रतिनिधिसभाको निर्वाचनमा उम्मेदवारी दिएको उनले बताए।
नोभेम्बर ३ मा हुने निर्वाचनमा निर्वाचित भए राज्यस्तरका नीति, बजेट र विकासका विषयमा काम गर्ने उनको योजना छ।
