राष्ट्रिय प्रजातन्त्र पार्टी (राप्रपा) का वरिष्ठ उपाध्यक्ष रवीन्द्र मिश्रले विवेकशील साझा र रास्वपाबीच एकता भएकोमा शुभकामना दिएका छन्।
५ बुँदे सहमति पत्रमा हस्ताक्षर गर्दै विवेकशील साझा र रास्वपाले आज एकता घोषणा गरेका हुन्।
त्यसतर्फ लक्ष्य गर्दै राप्रपा वरिष्ठ उपाध्यक्ष मिश्रले भनेका छन्, ‘मार्ग परिवर्तन गर्न नचाहेका मेरा साथीहरूलाई आजको एकताका लागि मेरो हृदयदेखिको शुभकामना छ, र एउटै मात्र अनुनय विनय छ: तपाईँहरूबाट "व्यक्ति जित्ने, देश हार्ने राजनीति" गरेको कहिल्यै देख्न नपरोस्।’
मिश्र विवेकशील साझाबाट मार्ग परिवर्तन गरी राप्रपामा प्रवेश गरेका थिए। त्यसबेला समीक्षा बास्कोटालगायत नेताहरू भने विवेकशील साझामै रहेका थिए। अहिले बास्कोटासहित नेताहरू रास्वपासँग एकतामा गएका हुन्। यो एकतामा नेता मिलन पाण्डे भने सहभागी भएनन्।
आफूले मार्ग परिवर्तन गर्दा कतिपयले आलोचना गरेको मिश्रको भनाइ छ।
‘मैले 'मार्ग परिवर्तन' गरेपछि विवेकशील साझामै रहने निर्णय गर्नुभएका कतिपयले मेरो आलोचना गरे। कतिले मलाई घृणा गरे। तर उनीहरूको मलाई साँच्चिकै माया र श्रद्धा लाग्छ,’ उनले आज फेसबुकमा लेखेका छन्, ‘त्यसैले उनीहरूले मबारे जे भने पनि मैले उनीहरूबारे एक शब्द नराम्रो बोलेको छैन। उनीहरू सोच्छन्- मैले उनीहरूलाई धोका दिएँ. मैले सोचेँ, "मैले 'मार्ग परिवर्तन' गरिनँ भने त्यो उनीहरूका लागि मात्र होइन, यो देश र भावी पुस्ता सबैका लागि धोका हुनेछ।’
व्यापक आलोचना र घृणा सहेर मार्ग परिवर्तनको बाटो लिएको उनले स्मरण गरेका छन्।
-1746009348.jpg)
