नेपाली कम्युनिष्ट पार्टीका संयोजक प्रचण्ड जहाँजहाँ जान्छन्, त्यहाँको भुगोल र संस्कृति र आम मानिसका मनोभाव बुझेर भाषण गर्न खप्पिस छन्।
चुनाव लड्न मधेस जाँदा उनले मधेससँग ‘लभ’ परेको कुरा गर्थे। गोरखा जाँदा जनयुद्धका प्रथम शहिदको जिल्ला भनेर आए भन्छन्। रोल्पामा चुनाव लड्दा शहिदको सम्मान गर्न उम्मेदवार बनेर आएको उनले बताउने गर्थे। यसपालि भने उनले पोखरा आएर कास्की जिल्लाको छोरा भएको बताएका छन्।
चितवनमा हुर्किएका प्रचण्डको जन्म कास्कीको ढिकुरपोखरीमा भएको थियो। उनी सानै उमेरमा हुँदा परिवार चितवन बसाइसराई गएका थिए। चितवनमा चुनाव लड्न जाँदा पनि उनले आफ्नो गृहजिल्ला चितवन भएको बताएका थिए।
शनिबार पोखरामा आयोजित नेपाली कम्युनिष्ट पार्टीको एकता सन्देश सभालाई सम्बोधन गर्दै प्रचण्डले कास्कीको छोरो भएको बताएर कास्कीमै चुनाव लड्न आउने हो कि भन्ने आशंका कार्यकर्ताहरूले गरेका छन्। एमालेको जनसंगठन बलियो भएको कास्कीमा चुनाव लड्न भने प्रचण्डलाई अन्यत्र जस्तो सजिलो भने छैन।
देशमा ठुला ठुला राजनीतिक परिवर्तनका घटनाहरू, हत्याकाण्डहरू चल्दासमेत भदौ २४ गते जस्तो विध्वश नभएको भन्द उनले केही घण्टा देश राज्यविहीन अवस्थामा पुगेको बताए। राष्ट्र नै रहने हो कि नरहने हो भन्ने सन्त्रास फैलिरहेका बेला आफुलाई शुरूमा प्रधानसेनापति र पछि राष्ट्रपतिले फोन गरेर शितलनिवास बोलाएको प्रचण्डले बताए।
रातभरी छलफल गरेर संविधान बचाउने र राष्ट्रपति संस्था जोगाउन सहजीकरण गरेको दाबी गर्दै उनले आफुहरूले गरेको सहजीकरण अनुसार नै देश अघि बढेको दाबी गरे।
‘अहिलेको अन्तरिम सरकार र ६ महिनापछि निर्वाचनको घोषणा हामी समेतको सहजीकरणमा सम्भव भयो,’ उनले भने, ‘म त कास्कीको छोरो, यो कुरा तपाइहरूको अगाडि भन्न पाउँदा खुशी र गौरव महशुष भएको छ।’
राष्ट्रिय स्वतन्त्रता र स्वाधिनताको रक्षा गर्न एकपटक अघि आउन जरूरी छ,’ उनले भने, ‘अहिले पनि कुनै न कुनै घटना घटाउने प्रपञ्च भित्रभित्रै चलिराखेको छ।’
चुनाव जित्नु र सरकार बनाउने उदेश्यले मात्र आफुहरूले पार्टी एकता गरेर सन्देश सभा नगरेको प्रचण्डले बताए। उनले दुइतिहाइकै सरकार पनि भागाभाग भएको भन्दै त्यस्तो खालको घमण्ड र अहंकार अब नचल्ने बताए।
-1746009348.jpg)
