राष्ट्रिय स्वतन्त्र पार्टी (रास्वपा) ले नवप्रवेशीलाई स्थान दिन छुट्टै निकाय बनाएको छ।
यसबारे रास्वपा र विवेकशील साझाबीच आज भएको ५ बुँदे सहमति पत्रमा पनि उल्लेख छ।
रास्वपाले संघीय नेतृत्व मञ्च निर्माण गरेको हो।
यो निकाय रास्वपाको महाधिवेशनसम्मका लागि बनाइएको हो।
‘रास्वपाको राष्ट्रिय महाधिवेशनसम्मका लागि बनाइएको विशेष संयन्त्र 'संघीय नेतृत्व मञ्च' मा विवेकशील साझा पार्टीबाट एकीकरणको प्रक्रियाबाट आउने नेताहरूलाई आपसी समझदारीमा मनोनयन गर्ने सहमति छ,’ रास्वपा र विवेकशील साझाका शीर्ष नेताहरूले हस्ताक्षर गरेको सहमति पत्रमा उल्लेख छ।
रास्वपामा यसअघि संघीय नेतृत्व मञ्च भन्ने निकाय थिएन। विवेकशील साझासँग एकता तयारी हुँदै गर्दा यस्तो मञ्च बनाउने प्रस्तावबारे पार्टीभित्र चर्चा भएको थियो।
संघीय नेतृत्व मञ्चका सदस्यको वरीयता केन्द्रीय समितिको सदस्य सरह हुने रास्वपाले जनाएको छ।
‘विवेकशील साझा पार्टीका सदस्य र सल्लाहकारलाई केन्द्रीय, प्रादेशिक र स्थानीय तहगत संरचनामा समुचित समायोजन गरी जिम्मेवारी तोक्दा योग्यता, समावेशिताको सिद्धान्त र सार्वजनिक छविलाई आधार मान्ने’ सहमति पनि भएको छ।
पार्टीमा एकता तथा समाहित भएकाहरूलाई स्थान दिन रास्वपाले संघीय नेतृत्व मञ्च बनाएको नेताहरूले जनाएका छन्।
-1764497921.jpeg)
-1746009348.jpg)
