नेपाली कम्युनिस्ट पार्टीको एकता सन्देश सभामा नेता भीम रावलले अधिकांश समय नेकपा एमालेका अध्यक्ष केपी शर्मा ओलीको आलोचनामा खर्चिए।
उनले एमाले र माओवादी केन्द्र एकता गरेर बनेको नेकपाको सरकार छँदा तत्कालीन प्रधानमन्त्री एवं पार्टी अध्यक्ष ओलीले दुई पटक संसद विघटन गरेको प्रसंग निकाले। त्यो विघटनलाई उनले नेकपाको सपनामाथि ओलीले तुसारापात गरेको बताएका थिए।
एमाले र माओवादी छुट्टिएपछि १० बुँदे समझदारी गरेर एमालेमा फर्किदा पनि आलीले ती बुँदा कार्यान्वन गर्न नदिएको उनले आरोप लगाए। सैद्धान्तिक रूपमा विपरित ध्रुबमा रहेका नेपाली कांग्रेससँग आधाआधा कार्यकाल बाडिचुँडी खाने गरी ओलीले सहमति गरेको विषय पनि रावलले उठाए।
अध्यक्ष ओलीले २०८४ को निर्वाचनमा बहुमत ल्याउन भन्दै चलाएको मिसन ८४ लाई उनले पतनको चौरासी भनेको सम्झिएर आफ्नो भविश्यवाणी ठ्याक्कै मिलेको दाबी पनि गरे।
‘मिसन चौरासी होइन, पतनको चौरासीको प्रतिक्षा गर्नुस भनेको थिए, भविष्यवाणी ठ्याक्कै मिलेछ,’ उनले भने, ‘पार्टी त खरानी भयो भयो, व्यवस्थापिका, कार्यपालिका र न्यायपालिका पनि आगोमा जलिरह्यो। प्रधानमन्त्रीले सुरक्षा बैठक बोलाएनन्, पद छोड्दिन भनेर अडिनुभयो।’
जेनजी आन्दोलनमा यसरी अडिएका ओलीले आगोको लप्का ढोकाभित्र आएपछि हेलिकप्टर चढेर भाग्नु परेको पनि रावलले बताए।
‘देशको प्रधानमन्त्री देशको नायक हो। सैनिक भाषामा कमाण्डर हो। आफू खरानी हुन सक्छ, तर देशलाई खरानी हुन बाट जोगाउँछ। ओलीले जोगायो त,’ उनले प्रश्न गरे।
एमालेमा आफ्नो प्रियजन रहेको भन्दै उनले खरानी घस्न एमालेमा नबस्न पनि उनले आग्रह गरे। प्रधानमन्त्री भागेको र राज्यका सम्पूर्ण अंगहरु खरानी भएको हेर्न एमालेमा नबस्न र नेपाली कम्युनिष्ट आन्दोलनमा समाहित हुन उनले आह्वान गरे।
धनगढी र पोखराको सभामा मानिसहरूको उपस्थिति देखेपछि रावलले नेकपा भन्न छाडे, एमाले भन्न थाले। ओलीको आलोचना गर्दा गर्दे उनले भने, ‘आउने निर्वाचनमा नेकपा एमालेको बहुमतलाई, एमालेको यात्रालाई कसैले रोक्न छेक्न सक्ने छैन।’
उनले यसो भनिरहँदा सभामा उपस्थित नेता तथा कार्यकर्ताबीच हाँसो गुञ्जिएको थियो। तत्काल रावलले भनाइ सच्याएर भने, ‘नेपालाी कम्युनिष्ट पार्टीको यात्रालाई कसैले रोक्न सक्ने छैन।’
-1746009348.jpg)
