निर्वाचन आयोगले फागुन २१ गते हुने प्रतिनिधि सभा निर्वाचनका लागि मौज्दातमा रहेको मतपेटिका प्रयोग गर्ने भएको छ।
आयोगले अघिल्लो पटकको निर्वाचनका दौरान खरिद गरिएका मतपेटिका प्रयोग गर्ने निर्णय गरेको हो।
आयोगसँग हाल ९० हजार मतपेटिका मौज्दात छन्। निर्वाचन आयोगसँग ४३ लिटर, ८० लिटर र ८५ लिटर क्षमताका मतपेटिका रहेका छन्।
प्रतिनिधि सभा निर्वाचनका लगि ४५ हजार मतपेटिका पर्याप्त हुने आयोगको ठहर छ।
त्यस्तै मतपत्र छपाइका लागि अघिल्लो पटक खरिद गरिएको कागज प्रयोग गर्ने भएको छ। आयोगलाई मतपत्र छपाइका लागि ३ सय मेट्रिक टन कागज आवश्यक हुन्छ तर आयोगसँग ५ सय ६६ मेट्रिक टन कागज मौज्दात छ ।
आयोगले निर्वाचनका लागि अन्य सामग्रीका लागि भने खरिद प्रक्रिया अघि बढाउने तयारी गरिरहेको छ।
निर्वाचन आयोगका प्रवक्ता नारायणप्रसाद भट्टराईले आयोगसँग केही सामाग्री मौज्दात रहेको र केही सामान पनि आवश्यक मात्रामा मात्र खरिद गर्न लागिएको सेतोपाटीलाई बताए।
‘मतपत्र छाप्न पुग्ने गरी कागज छ’, भट्टराईले भने, ‘मतपत्रमा छाप लगाउने स्वस्तिक चिन्ह पनि मौज्दातमा छ। अपुग अलिकति खरिद गर्नुपर्ने छ।’
भट्टराईका अनुसार मतदानका क्रममा गरिने छेकबारका सामान पनि आयोगसँग केही मौज्दात छन्। केही खरिद गर्दा पुग्ने अवस्था छ।
‘निर्वाचन आयोग यसपटक मितव्ययी ढंगले निर्वाचन गराउने तयारीमा छ’, भट्टराईले भने, ‘तर आयोगले कुनै क्षेत्रमा मतदानमा अवरोध भए तत्कालै अर्को निर्वाचन गराउने गरी सामान मौज्दात राख्नुपर्ने हुन्छ।’
आयोगका एक अधिकारीका अनुसार मतदानपछि मतपेटिका बाँध्न प्रयोग गर्ने कपडा पनि मौज्दात छन्।
‘अघिल्लो निर्वाचनमा ५० हजार मिटर कपडा किनिएको रहेछ’, ती अधिकारीले भने, ‘यी कपडा हामी जिल्लामा पठाउँछौँ। कम्तिमा आधा जिल्लाका लागि यो प्रयोग गर्न सकिने अवस्था छ।’
एउटा मतपेटिका बेर्न २ मिटर कोरा कपडा लाग्छ। ५० हजार मिटर कपडाले २५ हजार वटा मतपेटिका बेर्न सकिन्छ।
निर्वाचन सम्पन्न गराउन आयोगले ६२ प्रकारका सामानको व्यवस्थापन गर्नुपर्छ। आयोगले निर्वाचनका लागि प्लास्टिकका बोरादेखि, सियो, मैनबत्ती र सलाइसम्म खरिद गर्ने गरेको छ।
देशमा उपलब्ध हुने सामान आयोगले नेपालमै खरिद गर्छ तर निर्वाचनको दिन मतदाताको हातमा चिनो लगाउने मसीदेखि स्वस्तिक छापसम्म बाहिरबाट खरिद गर्ने गरेको छ।
निर्वाचन आयोगले फागुन २१ गतेको निर्वाचनका लागि आवश्यक सामाग्रीहरुको खरिद अघि बढाउने तयारी गरिरहेको छ।
मतदाता शिक्षामा जाने व्यक्तिलाई आवश्यक सामग्रीदेखि निर्वाचन अधिकृतको कार्यालयका लागि आवश्यक सामान आयोगले खरिद गर्न लागेको हो।
-1746009348.jpg)
