नेपाली कम्युनिष्ट पार्टीका संयोजक प्रचण्डले नेकपा एमालेका अध्यक्ष केपी शर्मा ओलीको अहंकारले देश बर्बाद भएको आरोप लगाएका छन्।
पोखरामा आइतबार आयोजित एकता सन्देश सभालाई संशोधन गर्दै उनले ओलीको नक्कली र हावादारी कुराको पर्दाफास गर्नुपर्ने बताए।
‘केपी ओलीको अहंकारले देश बर्बाद भएको छ। यो कुरा एमालेका इमान्दार नेता कार्यकर्ताले बुझ्दै गएका छन्,’ उनले भने, ‘ओलीको नक्कली, हावादारी कुरा ढिलोछिटो पर्दाफास हुन्छ।’
कांग्रेस र एमालेको झण्डै दुइतिहाई बहुमतको सरकार हुँदा १५ महिनाअघि प्रतिनिधि सभाको रोष्ट्रमबाट घमण्ड नगर्न सचेत गराएको पनि स्मरण गरे। मधेस र मध्यपहाडी यात्रामार्फत पनि सरकारलाई खबरदारी गरेको बताउँदै उनले सरकारले सुनुवाई नगरेको बताए।
संसदबाट बंगलादेशको जस्तो घटना हुन सक्छ भनेको कुरालाई लिएर अहिलेको विध्वंश प्रचण्डले नै गरेको भन्ने भ्रम फैलाउन लागेको उनले बताए।
‘घमण्ड नगर्नुस्, बंगलादेश हेर्नुस। राष्ट्रका विरूद्ध काम गर्नुभयो भने तपाईंको हालत पनि त्यस्तै हुन्छ भनेको थिए,’ उनले भने, ‘हेलिकप्टरबाट भाग्नुपर्ने स्थिति आयो। यो सब गराएको प्रचण्डले रहेछ नि भनेर झुटो प्रचार गर्ने कसरगत गर्दैछन्।’
पार्टीबाट अलग भएका नेताहरू प्रति लक्षित गर्दै प्रचण्डले केही समयपछि उनीहरू पनि ‘सरी’ भन्दै फर्किने उनले दाबी गरे। लोकतन्त्र जोगाउन व्यापक मोर्चा बनाउने तयारी आफूले गरेको भन्दै यसका लागि नेपाली कांग्रेसका नेताहरूसँग पनि संवादमा रहेको उनले खुलाए।
‘मोर्चा बनाउन नेपाली कांग्रेससँग पनि संवादमा छौं, मधेसमा देखिराख्नुभएकै होला। गम्भीर रूपमा संवाद गरेर लोकतन्त्रको रक्षा गर्नुपर्छ,’ उनले भने।
प्रधानमन्त्री सुशिला कार्कीले मुख्य तीन दलका शीर्ष नेता भेट्दिन भनेर अभिव्यक्ति दिएको भन्दै यसप्रति उनले रोष प्रकट गरे। जनाधार भएका नेतालाई नभेट्ने र जनाधार नभएका नेता मात्र भेट्नु भनेको चुनावप्रति गम्भीर नदेखिने उनले दाबी गरे।
‘सरकारले फलानो नेता भेट्छु फलाना नेता भेट्दिन भनेर बस्यो। जसको सबभन्दा बढी जनाधार छ तिनीहरूलाई भेट्दिन, जसको केही छैन तिनीहरूलाई मात्र भेट्छु भन्यो भने चुनाव प्रति गम्भीर भएको देखिने छैन,’ उनले भने।
कार्कीलाई प्रधानमन्त्री नियुक्त गर्न आफू र अर्का नेता माधव नेपालले सहमति दिएको कुरा बुझ्न प्रचण्डले आग्रह गरे।
‘यो सरकारले के बुझ्न जरूरी छ भने भदौ २६ गते राति म र माधव कमरेड राष्ट्रपतिकहाँ बसेर सुशिला कार्कीलाई प्रधानमन्त्री बनाउन सहमति गरेको हो। यो कुराको हेक्का सरकारले गर्न जरूरी छ,’ उनले भने। ्
चुनावको वातावरण बनाउन आफूले अहिले अभियान चलाएको पनि उनले बताए। दलहरूबीच छलफलको प्रक्रिया चलेको भन्दै छिट्टै सरकारलाई सकारात्मक सुझाव दिएर चुनाव सम्पन्न गर्न अघि बढ्ने उनले बताए।
देश जोगाउन जनताको बलियो एकता आवश्यक पर्ने भन्दै उनले चुनाव हुन्छ कि हुँदैन भनेर दुविधामा बस्न जरूरी नभएको उनको भनाई छ।
‘फागुन २१ गते चुनाव होला र भनेर कोही पनि दुविधामा बस्न जरूरी छैन। चुनाव फागुन २१ गते हुन्छ, हुनैपर्छ,’ उनले भने, ‘हाम्रो एकता सन्देश सभा देशभर र जिल्ला जिल्लामा पुग्दा चुनावी माहौल पैदा हुन्छ।’
-1746009348.jpg)
