नेकपा एमालेका पोलिटब्युरो सदस्य कर्ण थापामाथि केन्द्रीय कार्यालयमै दुर्व्यवहार भएको भन्दै पार्टीका नेताहरूले निन्दा, भर्त्सना गरिरहेका छन्।
आइतबार ११ औं महाधिवेशनको लोगो सार्वजनिक गर्ने कार्यक्रममा पुगेका पोलिटब्युरो सदस्यलाई अध्यक्ष केपी शर्मा ओलीको सुरक्षामा खटिएका स्वयंसेवकले धकेलेको भिडिओ सामाजिक सञ्जालमा देख्न सकिन्छ।
उनलाई दाङका कृष्णसागर वलीले धकेलेको एमालेकै नेताहरूले बताएका छन्। जुन सामाजिक सञ्जालमा छ्याप्छ्याप्ती बनाइएको भिडिओमा पनि देख्न सकिन्छ।
अहिले एमालेवृत्तमै घटनाबारे टिप्पणी भइरहेकाले र पक्षविपक्षमा बहस भइरहेकाले यसबारे हामीले कर्ण थापालाई सोध्यौं।
उनले लोगो सार्वजनिक कार्यक्रममा जानुअगावै अध्यक्षको सुरक्षामा खटिएका वली थरका युवकले धकेलेको बताए।
'लोगो सार्वजनिक कार्यक्रम सुरू हुनुभन्दा अगाडि नै म पार्टी कार्यालयमा थिएँ। त्यहाँ सञ्चार माध्यमहरूले कुरा गर्नुपर्यो भनिरहनुभएको थियो। महाधिवेशनका सन्दर्भमा मैले धारणा राखिरहेको थिएँ। कुराकानी सकिएको मात्र थियो, अध्यक्षज्यू आइपुग्नुभयो। नेताहरूको पछिपछि हिँड्ने मान्छे म होइन। तर अध्यक्षज्यूले मलाई देख्नेबित्तिकै च्याप्पै हात समातेर माथि जाऊँ भन्नुभयो। अध्यक्षज्यूले हात समातेपछि म उहाँको पछि जाँदै थिएँ। अचानक धकेलिएँ,' उनले सेतोपाटीसँग भने।
उनले अध्यक्षको सुरक्षा घेरामा रहेका भनिएका व्यक्तिहरू आपराधिक पृष्ठभूमिको रहेको भन्दै आफूले यसबारे अध्यक्षलाई नै जानकारी गराएको पनि बताए।
'त्यो वली भाइको पृष्ठभूमि विवादित छ। अध्यक्षज्यूको सुरक्षामा खटिएका आपराधिक पृष्ठभूमिका पनि छन्। जुन कुरा मैले अध्यक्षज्यूलाई कार्यक्रम सकिएपछि पनि जानकारी गराएको छु,' उनले भने, 'आपराधिक व्यक्तिहरू लिएर हिँड्नु उचित होइन।'
हामीले केन्द्रीय प्रचार विभाग प्रमुख राजेन्द्र गौतमलाई पनि सोध्यौं।
उनले अध्यक्षको सुरक्षार्थ खटिएकाहरू हिँड्दा सामान्य धक्कामुक्का भएको हुन सक्ने भन्दै यसलाई सामान्य रूपमा लिन आग्रह गरे।
'म पनि त्यहीँ पछाडि थिएँ। उहाँ प्रेस कन्फ्रेन्स हेर्न जानुभएको थियो। अध्यक्षज्यूसँग पछाडि पछाडि जाँदै हुनुहुन्थ्यो। अध्यक्षज्यूको सुरक्षामा खटिएहरू हिँड्दा केही असजिलो भयो होला। धक्का लाग्यो होला। यसलाई सामान्य रूपमा लिनुपर्छ,' उनले भने, 'यो ननइस्यु हो, इस्यु बनाइँदैछ। महाधिवेशनको बेला पनि छ। त्यसैले इस्यु बनाइएको हुनसक्छ। यो कुनै इस्यु नै होइन।'
उनले अहिले कुटपिट, दुर्व्यवहार भएको भन्दै प्रचार भइरहेको भन्दै यसरी नबुझ्न आग्रह गरे।
'म पनि त्यहीँ पछाडि थिएँ। कसैले कुटपिट गरेको छैन,' उनले भने।
-1746009348.jpg)
