इसराइलका प्रधानमन्त्री बेन्जामिन नेतन्याहूले आफूविरूद्ध पाँच वर्षदेखि चलिरहेको भ्रष्टाचारसम्बन्धी मुद्दामा माफी दिन राष्ट्रपतिसमक्ष निवेदन गरेका छन्।
प्रधानमन्त्री नेतान्याहूले आफ्नो वकिलमार्फत राष्ट्रपति कार्यालयमा आइतबार माफीको निवेदन दिएको अन्तर्राष्ट्रिय समाचार संस्था रोयटर्सले जनाएको छ।
उनीमाथि भ्रष्टाचार, धोखाधडी र विश्वासघात गरेको आरोपमा २०१९ देखि मुद्दा चलिरहेको छ।
उनले आफूमाथि झुटो मुद्दा चलाइएको र अदालतबाट सफाइ पाउने दाबी गर्दै आएका छन्।
तर मुद्दाकै कारण देश र सरकार चलाउन बाधा पुगेको भन्दै उनले यसबाट मुक्ति दिन राष्ट्रपति कार्यालयमा निवेदन दिएका हुन्।
'आज मेरा वकिलहरूले राष्ट्रपतिसमक्ष क्षमादानको आग्रह पठाएका छन्। देशको भलो चाहने सबैले यस कदमलाई समर्थन गर्ने अपेक्षा गरेको छु,' नेतन्याहूले भिडिओ सन्देश जारी गर्दै भनेका छन्।
विपक्षी नेता याइर लापिडले भने आममाफीको विषय दोषी ठहर भएपछि वा सजाय पाएपछि मात्रै हुने र अहिले त्यो स्थिति नभएको बताएका छन्।
'दोष स्वीकार नगरी, पश्चाताप नगरी र तत्काल राजनीतिबाट अवकाश नलिएसम्म नेतान्याहूलाई क्षमादान दिन हुँदैन,' उनले भने।
इसराइलमा परम्परागत रूपमा अदालतको प्रक्रिया पूरा भएर दोष सिद्ध भएपछि मात्र क्षमादान दिइने चलन रहँदै आएको छ।
तर नेतान्याहूका वकिलहरूले यो मुद्दा राष्ट्रिय हितसँग जोडिएको भन्दै राष्ट्रपतिले विशेष हस्तक्षेप गर्न सक्ने तर्क गरेका छन्।
राष्ट्रपति इसाक हर्जोगको कार्यालयले नेतान्याहूको अनुरोध गम्भीर विषय भएकाले सबै पक्षको राय संकलनपछि जिम्मेवारीपूर्वक निर्णय लिइने जनाएको छ।
अमेरिकी राष्ट्रपति डोनाल्ड ट्रम्पले समेत यसअघि हर्जोगलाई पत्र लेख्दै नेतान्याहूविरुद्धको मुद्दा राजनीतिक भएकाले क्षमादान दिन आग्रह गरेका थिए।
नेतान्याहूविरूद्ध सन् २०१९ मा तीन वटा मुद्दामा मुद्दा परेका थिए।
ती मुद्दामा उनले प्रभावशाली व्यवसायीहरूलाई सुविधा दिएबापत उपहार र अनुकूल समाचार कभरेज पाएको आरोप लगाइएको छ। उनले ती सबै आरोप बारम्बार अस्वीकार गर्दै आएका छन्। उनको समर्थनमा राष्ट्रिय सुरक्षा मन्त्री इतामार बेन–ग्भिर र अर्थमन्त्री बेजालेएल स्मोट्रिच जस्ता गठबन्धन सरकारका नेताहरू उभिएका छन्।
विपक्षी सांसद याइर गोलानले भने नेतान्याहूले राजीनामा दिनुपर्ने र राष्ट्रपतिले क्षमादान दिन नहुने बताएका छन्। नेतान्याहू इसराइलका सबैभन्दा विवादास्पद नेतामध्ये एक मानिन्छन्। उनी पहिलोपटक सन् १९९६ मा प्रधानमन्त्री निर्वाचित भएका थिए र सन् २०२२ को चुनावपछि पुनः सत्तामा फर्किएका हुन्।
सन् २०२३ अक्टोबर ७ मा हमासले इसराइलमाथि गरेको आक्रमणपछि सुरु भएको गजाको युद्ध तथा त्यसपछिका क्षेत्रीय संघर्षका कारण पनि नेतान्याहूको नेतृत्व अन्तर्राष्ट्रिय रूपमा आलोचित हुँदै आएको छ।
अहिलेको सर्वाधिक दक्षिणपन्थी गठबन्धन सरकारले सन् २०२६ अक्टोबरसम्म हुने चुनावमा पर्याप्त सिट जित्न कठिन हुने विभिन्न जनमत सर्वेक्षणहरूले देखाएका छन्।
-1746009348.jpg)
