नेपाली कांग्रेसका प्रवक्ता प्रकाशशरण महतले पुसभित्रै १५ औं महाधिवेशन हुने भएपछि विशेष महाधिवेशनको आवश्यकता नै नरहेको प्रतिक्रिया दिएका छन्।
आज सानेपामा केन्द्रीय समितिले गरेका निर्णय सार्वजनिक गरेपछि पत्रकारहरूले सोधेको प्रश्नमा जबाफ दिएका प्रवक्ता महतले भने, ‘पुसमै १५ औं महाधिवेशन हुने भएपछि विशेष महाधिवेशनको त आवश्यक नै परेन नि! विशेष महाधिवेशन हस्ताक्षरकर्ताहरूको मूल कुरा समयमै महाधिवेशन हुनुपर्छ भन्ने थियो। महाधिवेशन कार्यतालिका आइसकेको र त्यो कार्यतालिका अनुसार अधिवेशन अघि बढ्ने भएकोले विशेष महाधिवेशनतिर अघि बढ्न परेन।’
कांग्रेसमा ५४ प्रतिशत महाधिवेशन प्रतिनिधिहरूले विशेष महाधिवेशन माग गर्दै असोज २९ गते कार्यवाहक सभापति पूर्णबहादुर खड्कालाई हस्ताक्षर बुझाएका थिए।
कांग्रेसले आजको केन्द्रीय समिति बैठकबाट पुस २६ देखि २८ गतेसम्म १५ औं महाधिवेशन गर्ने गरी सर्वसम्मत रूपमा कार्यतालिका ल्याएको छ।
-1746009348.jpg)
