नेपाली कम्युनिस्ट पार्टीका नेता भीम रावलले आइतबार पोखराको सभामा 'एमालेलाई बहुमत…' भनेको विषयमा सोमबार स्पष्टीकरण दिएका छन्।
नेकपाको प्रदेश स्तरीय सन्देश सभा अन्तर्गत सोमबार विराटनगरमा आयोजित सभालाई सम्बोधन गर्दै रावलले आइतबार आफूले बोलेको विषयमा स्पष्टीकरण दिएका हुन्।
'हिजो पोखरामा मैले नेपाली कम्युनिस्ट पार्टी भन्नुपर्नेमा आउँदो चुनावमा एमालेलाई जिताउ भनेछु। ५० वर्षदेखि त्यही भन्दै आएको हु। मेरो जिब्रोले त्यही भनेछ,' उनले भने।
यति सुन्दा ओली लगायतलाई शीतल भएको उनले बताए।
'विचारबाट च्युत भएपछि, सिद्धान्तबाट च्युत भएपछि यस्तै उखान टुक्काहरुको सहारामा बस्नुपर्ने बाध्यता हुन्छ। गुण्डुमा ओली त्यही गरिरहेका छन्,' उनले भने।
पोखराको सभामा ओलीको आलोचना गर्दागर्दै रावलले एमालेको नाम लिएका थिए।
‘आउने निर्वाचनमा नेकपा एमालेको बहुमतलाई, एमालेको यात्रालाई कसैले रोक्न छेक्न सक्ने छैन,' उनले पोखरामा भनेका थिए।
पछि त्यहीँ रहेका नेताहरूले उनलाई सच्याउन आग्रह गरेका थिए। त्यसपछि उनले नेपाली कम्युनिस्ट पार्टीको जित रोक्न सक्दैन भनेका थिए।
उनले अन्तरिम सरकारले विद्युतमा नोक्सान हुने गरी सम्झौता गरेको आरोप लगाए।
'विभिन्न सम्झौता गरेको छ। यो सरकारको प्राथमिकता चुनाव हो। हतियार फिर्ता ल्याउने, हराएका गोली गठठा फिर्ता ल्याएर निष्पक्ष निर्वाचन गर्नुपछ। नेपाली कम्युनिस्ट पार्टी यो माग गर्दछ,' उनले भने।
-1746009348.jpg)
