हामी नेपालका अध्यक्ष एवं जेनजी आन्दोलनका अगुवा सुदन गुरूङले नेपालका ‘एक्सपर्ट’ भनौदाहरू पद माग्न आफूकहाँ आउने गरेको बताएका छन्।
तमु ह्युला छोंज धीं गुरूङ राष्ट्रिय परिषद कास्कीले सोमबार पोखरामा आयोजना गरेको सम्मान कार्यक्रममा बोल्दै गुरूङले उक्त कुरा बताएका हुन्।
‘सबै एक्सपर्ट भनौदाहरू कोही मन्त्रीका लागि आउँछन्। कोही पदका लागि आउँछन्। कोही के भनेर आउँछन्,’ उनले भने, ‘देशका लागि कोही पनि आएनन्।’
युवा पुस्ताले अवसर पाउँदा प्रधानमन्त्री र मन्त्री पद त्याग गरेको भन्दै उनले जेनजी आन्दोलनपश्चात आफूलाई भेट्न आउनेहरू आफ्ना-आफ्ना स्वार्थ लिएर आउने गरेको पनि बताए।
राजनीतिक दलका नेता/कार्यकर्ता भएको भए कुनै पनि पद नछाड्ने उनले जिकिर गरे।
‘युवाको मन कति ठूलो होला आज प्रधानमन्त्री, गृहमन्त्री पद युवा पुस्ताले देशको हितका लागि त्यागेको पद हो,’ उनले भने, ‘कुनै पार्टीको मान्छे भएको भए पद छोड्दैनथ्यो, सानो सानो पद पनि छोड्दैनथ्यो।’
पछिल्लो समय गृहमन्त्री ओमप्रकाश अर्याल विरूद्ध अभिव्यक्ति दिँदै हिँडेका गुरूङले पोखरामा सोमबार पनि गृहमन्त्री अर्यालको आलोचना गरे।
राष्ट्रपति कार्यालयमा वार्ता गर्न जाँदा कानुनविद् भनेर आफूसँग परिचय गरेको भन्दै उनले आफूलाई अर्यालले गलत सल्लाह दिएको दाबी गरे।
अर्याल बच्चाको रगतमा गृहमन्त्री बनेर बसेको आरोप लगाउँदै उनले त्यतिबेला संविधान संशोधन नगरी जेनजीको माग पूरा हुन सक्दैन भनेर सल्लाह नदिएको बताए।
‘ओमप्रकाश अर्याल मेरो साइडमा बस्नुभयो र हामीलाई सल्लाह दिनुभयो। उहाँले हामीलाई राम्रो सल्लाह दिनुभएन,’ उनले भने, ‘त्यतिबेला उहाँले भन्न सक्नुहुन्थ्यो कि बाबु तपाईंहरूको जेनजीको माग पूरा हुन सक्दैन, यो संविधान यसरी नै रह्यो भने। यसलाई संशोधन गर्न सकिएन भने माग पूरा हुन सक्दैन भनेर सल्लाह दिन सक्नुहुन्थ्यो। तर उहाँले गलत सल्लाह दिनुभयो। अब हामीले कसलाई विश्वास गर्ने!’
-1746009348.jpg)
