नेपाली कांग्रेस केन्द्रीय समिति बैठकले १५ औं महाधिवेशन कार्यतालिका ल्याएपछि क्रियाशील सदस्यता व्यवस्थापन समिति बैठक आह्वान भएको छ।
कांग्रेसमा महामन्त्री गगन थापाको नेतृत्वमा क्रियाशील सदस्यता व्यवस्थापन समिति छ।
उक्त समितिका सदस्य प्रकाश रसाइली 'स्नेही' ले सेतोपाटीलाई दिएको जानकारीअनुसार समितिको बैठक बुधबार बिहान ११ बजे केन्द्रीय कार्यालय सानेपामा बस्नेछ।
‘केन्द्रीय समितिले महाधिवेशन कार्यतालिका ल्याएकोले क्रियाशील सदस्यता नवीकरण र नयाँ वितरण फास्ट ट्र्याकबाट अघि बढाउँदैछौं,’ उनले भने, ‘क्रियाशील सदस्यता वितरण केन्द्रीय समितिको भावनाअनुसार उदारतापूर्वक गर्ने र त्यसका लागि सहजीकरण गर्ने तयारी छ।’
क्रियाशील नवीकरण र नयाँ वितरणका काम सहज ढंगले अघि बढाइने पनि उनले बताए।
कांग्रेसमा करिब ९ लाख क्रियाशील सदस्य रहेकोमा वडा तहमा अहिलेसम्म ६ लाखले नवीकरण गरेका छन् भने नयाँ क्रियाशील सदस्यता वितरण भएको छैन।
केन्द्रीय समितिले केन्द्रबाट नयाँ क्रियाशील फारम वितरण मंसिर २० गतेभित्र गरिसक्ने निर्णय गरेको छ।
साथै प्रतिनिधि सभा क्षेत्रीय कार्यसमिति हुँदै वडासम्म नयाँ क्रियाशील सदस्यको फारम मंसिर २४ गतेभित्र पठाइसक्नुपर्ने तालिका छ।
क्रियाशील सदस्यको अन्तिम सूची तयार गरी सभापति/कार्यवाहक सभापतिलाई बुझाउने अवधि पुस १४ गते छ।
त्यसअनुसार समयबद्ध रूपमा काम गर्न क्रियाशील सदस्यता व्यवस्थापन समितिले समन्वयकारी भूमिका खेल्दै द्रुत गतिमा काम अघि बढाउन लागेको उनले बताए।
कांग्रेसले विधान संशोधन मस्यौदा समिति, क्रियाशील सदस्यता केन्द्रीय छानबिन समिति, केन्द्रीय निर्वाचन समितिलाई पनि पूर्णता दिने तयारी गरेको छ।
यो समितिहरू गठन गर्न सभापति र कार्यवाहक सभापतिले काम गर्नेछन्।
यस्तो छ नयाँ क्रियाशील सदस्यता मापदण्ड;
१. नेपाली कांग्रेसको क्रियाशील सदस्यता लिन चाहने नेपाली कांग्रेसको विधान, २०१७ ( संशोधन सहित) को धारा ४ को उपधारा (१) र (३) बमोजिम योग्यता पुगेका व्यक्तिलाई सहज रूपमा सदस्यता प्रदान गर्ने कुनै पनि पनि योग्य व्यक्तिलाई सदस्यताबाट बञ्चित नगर्ने।
२. प्रतिनिधि सभाको क्षेत्रमा पार्टीको १४ औं महाधिवेशनमा कायम रहेको क्रियाशील सदस्य संख्याको सामान्यतया शतप्रतिशत नयाँ क्रियाशील सदस्यता फारम प्रतिनिधि सभा क्षेत्रलाई केन्द्रले उपलब्ध गराउनेछ।
३. यसका अतिरिक्त वडाको जनसंख्या, मतदाता क्रियाशील सदस्यताको अनुपातमा आवश्यकता अनुसार थप माग भए बमोजिम सदस्यता वितरण गर्न सक्ने गरी सदस्यता फारम उपलब्ध गराउने व्यवस्था गर्ने।
४. वडाको जनसंख्याभित्र पनि महिला, आदिवासी जनजाति, दलित, मधेसी, खस आर्य, थारु, मुस्लिम, अल्पसंख्यक, अपाङ्गताको जनसंख्यालाई मध्येनजर गरी सोही आधारमा समानुपातिक/समावेशी प्रतिनिधित्वलाई ध्यान दिने।
५. नयाँ क्रियाशील सदस्यता वितरण गर्दा १८ देखि ३० वर्षका युवाको व्यापक प्रतिनिधित्व हुने गरी प्राथमिकता दिई वितरण गर्नु पर्ने।
६. समाजमा विभिन्न पेशागत बुद्धिजीवी तथा सामाजिक कार्यमा संलग्न व्यक्तिहरुलाई प्राथमिकता दिनुपर्ने।
७. निर्वाचनका समयमा पार्टी र उम्मेदवारको पक्षमा मत जुटाउने अभियानमा संलग्न भएका व्यक्ति, पार्टीले आयोजना गरेको प्रशिक्षण, गोष्ठी, अन्तरक्रियालगायत राजनीतिक, सामाजिक, सांस्कृतिक एवं विविध रचनात्मक कार्यक्रममा सक्रियतापूर्वक सहभागी भएका व्यक्ति र पार्टी वा भ्रातृ संघको माध्यमबाट विकास निर्माण र अन्य सामाजिक कार्यमा सक्रिय रहेका व्यक्तिलाई क्रियाशील सदस्यता प्रदान गर्न आवश्यक प्रबन्ध गर्ने।
८. राष्ट्रिय मान्यता प्राप्त अन्य राजनीतिक दलबाट कांग्रेसमा प्रवेश गरेका व्यक्तिलाई अनिवार्य रूपमा क्रियाशील सदस्यता उपलब्ध गराउने।
-1746009348.jpg)
