नेकपा एमालेको ११औं महाधिवेशनबाट सय जनाभन्दा बढी युवाले केन्द्रीय कमिटीमा 'डेब्यु' को आकांक्षा राखेका छन्।
एमालेले पहिलो पटक युवाको क्लस्टर नै छुट्टयाएर प्रतिनिधि बनाएर ल्याएको छ। प्रतिनिधि बनेर आएका २०० भन्दा बढी युवा अनुहारमध्ये अधिकांशले केन्द्रीय कमिटी सदस्य बन्ने आकांक्षा राखेका छन्।
एमालेले केन्द्रीय कमिटीमा ४० वर्ष मुनिका कति युवा समावेश गर्ने भनेर क्लस्टर तोकिसकेको छैन। महाधिवेशनको हलले नै यसबारे निर्क्यौल गर्नेछ। यसपटक १० प्रतिशत नघट्ने गरी प्रतिनिधित्व गराउने तयारी भइरहेको एमालेका नेताहरूले बताएका छन्।
यसरी प्रतिनिधित्व गराउँदा यसपटकको महाधिवेशनमा कम्तीमा २५ जना युवा केन्द्रीय कमिटीमा समेटिनेछन्। यसबाहेक खुला प्रतिस्पर्धाबाटै आउने पनि कतिपय युवाहरूको तयारी छ।
प्रतिनिधित्वको बहस चलिरहँदा महाधिवेशनमा युवा आकांक्षी बढेका छन्। महिलाहरूको संख्या पनि अधिक छ। १० भन्दा बढी महिला उम्मेदवारले केन्द्रीय कमिटीमा डेब्यु हुने आकांक्षा राखेका छन्।
दैलेखको आठबीस नगरपालिकाकी उपमेयरसमेत रहेकी कम्पना कुमारी थापा चन्द यसपालि केन्द्रीय कमिटीमा डेब्यु गर्ने आकांक्षा राखेकी छन्। एमाले निकट अनेरास्ववियुमा लामो समय काम गरेकी थापा भूगोलबाट प्रतिनिधि चुनिएर आएकी हुन्।
जुम्लाबाट महिलातर्फ प्रतिनिधि चुनिएर आएकी मेनका पछाईं पनि केन्द्रीय सदस्यको दाबेदार हुन्। पछाईं विद्यार्थी राजनीति (अनेरास्ववियु) बाटै एमालेमा सक्रिय भएकी हुन्।
एमाले बागमती प्रदेश कमिटीकी उपसचिव भक्तकुमारी लामा यसपटक केन्द्रीय सदस्य बन्ने दौडमा छिन्। अनेरास्ववियुबाटै एमालेको राजनीतिमा सक्रिय भएकी लामा यसपटक प्रतिनिधिले विश्वास गरे केन्द्रीय कमिटीमा काम गर्ने चाहना राखेको बताउँछिन्।
अनेरास्ववियुका पूर्वनेताहरू कल्पना वाइवा, निशा अधिकारी पनि यसपटक केन्द्रीय सदस्य बन्ने दौडमा छन्।
निशा अधिकारी भूगोलबाट प्रतिनिधि छानिएकी हुन् भने वाइवा युवा विद्यार्थी विशेष जिल्ला कमिटीमार्फत् प्रतिनिधि बनेकी हुन्। अधिकारी चितवन क्षेत्र नम्बर ३ बाट महिला क्लस्टरबाट प्रतिनिधि बनेकी हुन्।
कोशी प्रदेशकी राज्यमन्त्रीसमेत रहेकी सिर्जना राईले यसपटक केन्द्रीय कमिटीमा डेब्यु गर्ने चाहना राखेकी छन्। उनी कोशीमा बिनाविभागीय सामाजिक विकास राज्यमन्त्री छन्। उनी भोजपुरबाट प्रतिनिधित्व गर्छिन्।
युवा विद्यार्थी विशेष जिल्ला कमिटीबाट प्रतिनिधि बनेकी उर्मिला सुनुवार, क्रान्ति बुर्लाकोटी र आरती भण्डारी पनि केन्द्रीय सदस्य बन्ने दौडमा छन्।
आरती भूमि समस्या समाधान आयोगकी सदस्य र एमाले मधेस प्रदेशकी उपसचिव हुन्।
त्यस्तै, केन्द्रीय सदस्य बन्ने दौडमा राधिका खतिवडा पनि छिन्। उनी पनि सर्र्लाहीबाट प्रतिनिधि बनेर आएकी छन्। वकालत क्षेत्रमा सक्रिय र यसैबाट सामाजिक छवि बनाएकी खतिवडा अनेरास्ववियुकै पृष्ठभूमिबाट राजनीतिमा सक्रिय भएकी हुन्।
-1746009348.jpg)
