नेकपा एमालेको ११ औं महाधिवेशनको चुनावी नतिजाले अध्यक्ष केपी शर्मा ओली र उनको टिमको वर्चश्व झनै बलियो गरी स्थापित गरेको छ।
१९ सदस्यीय पदाधिकारी टिममा ईश्वर पोखरेल समूहबाट दुई जनाले मात्रै चुनावी सफलता प्राप्त गर्दा गोकर्ण विष्ट उपाध्यक्ष र योगेश भट्टराई उपमहासचिव चुनिएका छन्।
एमाले भित्रको विपक्षी टिमबाट पदाधिकारीमा चुनाव जितेका यिनै दुई जनाले पार्टीभित्रको प्रतिपक्षी साख जोगाएका छन्।
विष्ट र भट्टराई यसपटक टिम ईश्वर निर्माणका मुख्य डिजाइनर मध्येका नेताहरू हुन्।
एमालेका ५ उपाध्यक्षमध्ये पोखरेल पक्षबाट विष्ट १३६८ मत ल्याएर उपाध्यक्ष बनेका छन्। पाँच जनामध्ये विष्ट चौंथो बनेका छन्।
त्यस्तै उपमहासचिवमा विजेता बनेका योगेश भट्टराईले १३४८ मत प्राप्त गरेका छन्। तीन जना उपमहासचिव चुनिने एमालेमा उनी तेस्रो बनेर पदाधिकारी छानिएका छन्।
उपाध्यक्षमा निर्वाचित गुल्मीका नेता विष्ट एमालेमा १० बुँदे पक्षधर भनेर चिनिन्थे। माधवकुमार नेपालहरूले पार्टी विभाजन गर्दा ओलीसँग १० बुँदे सहमति गरेर पार्टीभित्रै रहेका उनी सहितका नेताहरूले यसपटक ओली टिमलाई महाधिवेशनमा चुनौती दिएका थिए।
ईश्वर पोखरेललाई अध्यक्ष र सुरेन्द्र पाण्डेलाई महासचिवमा अघि सारेको टिमबाट उपाध्यक्ष जितेका पूर्वमन्त्री विष्ट एमाले भ्रातृसंस्था युवा संघका पूर्व अध्यक्ष हुन्। उनी दशौं महाधिवेशनबाट सचिव बनेका थिए।
उपमहासचिवमा निर्वाचित पोखरेल समूहका नेता योगेश भट्टराई ताप्लेजुङका हुन्। दशौं महाधिवेशनबाट सचिव बनेका उनले यसपटक निर्वाचनमार्फत पार्टीभित्रको पदसोपानमा एक खुड्किलो उक्लेका छन्।
अनेरास्ववियुको पृष्ठभूमिबाट उदाएका नेता भट्टराई अखिलको पूर्व अध्यक्षसमेत हुन्।
ताप्लेजुङबाट चुनाव लड्ने क्रममा अध्यक्ष केपी शर्मा ओलीले गएर भाषण गरिदिएको तर पछि सहयोग नगरेको भन्दै कुनैबेला ओलीका राजनीतिक सल्लाहकार विष्णु रिमालले सामाजिक सन्जालबाट योगेशमाथि प्रहार गरेका थिए।
११ औं महाधिवेशनमा उनै रिमाललाई पछाडि पार्दै योगेशले उपमहासचिवमा फड्को मारेका हुन्।
एमालेभित्र १० बुँदे पक्षधरकै ट्याग भिरेका पूर्वमन्त्री भट्टराईले निर्वाचनपछि ईश्वर पोखरेल र सुरेन्द्र पाण्डेको प्रशंसा गरेका छन्।
उनले फेसबुकमा लेखेका छन् ‘कमरेड ईश्वर पोखरेल, कमरेड सुरेन्द्र पाण्डे तपाईंहरूको इमान, निष्ठा र साहसको उच्च सम्मान सहित सलाम गर्दछु। टिमका सम्पूर्ण कमरेडहरूको एकता र सहकार्यप्रति आभारी छु।
सम्पूर्ण प्रतिनिधि सहित पार्टीका तमाम कमरेडहरूमा हार्दिक धन्यवाद ज्ञापन गर्दछु। पार्टी सदस्य तथा आम जनसमुदायको निगरानी र परीक्षामा सदा रहिरहने छु। ’
-1746009348.jpg)
