नेपाली कम्युनिस्ट पार्टी (नेकपा)का संयोजक पुष्पकमल दाहाल 'प्रचण्ड'ले जेनजीलाई पेवा नठान्न चेतावनी दिएका छन्।
शनिबार पार्टीको एकता सन्देश सभालाई सम्बोधन गर्दै संयोजक प्रचण्डले जेनजीलाई कसैले आफ्नो पेवा ठानेको भए त्यस्तो भ्रमबाट मुक्त हुन चेतावनी दिएका हुन्।
कसैले जेन्जी हाम्रै पेवा हो भन्ने ठानेको छ भने त्यो भ्रम हटाइदिए हुन्छ। जेन्जी एउटा उमेर समूह हो। हामी हौं प्रतिनिधि भनेर कसैले स्टन्ट नदिए हुन्छ,' उनले भने।
को सक्कली प्रतिनिधि हो भन्ने कुरा उसको विचार र राजनीतिक एजेन्डामा भर पर्ने प्रचण्डले बताए।
'नेपाली कम्युनिष्ट पार्टी मात्रै जसले भ्रष्टाचारविरूद्ध अभियान चलायो, जसले सुशासनका पक्षमा लडाइँ लड्यो, जसले यो देशका उत्पीडित वर्ग, जाति, क्षेत्र, समुदायको पहिचान र अधिकारको निम्ति कुर्बानी गर्यो, त्यो नै जेन्जी पुस्ताको सही अभिभावक र सही प्रतिनिधि हो,' उनले भने।
उनले जेनजीको प्रतिनिधि भनेर स्टन्ट देखाउनेहरूको पृष्ठभूमी र इतिहासबारे सबै अवगत रहेको पनि बताए।
'तपाईंहरूले यो राष्ट्र बचाउनको लागि के कति गर्नुभयो विगतमा हामीलाई लाई थाहा छ। तपाईहरूले धाक नलगाए हुन्छ दुनियाको अगाडि। तपाईंहरूले कसैले स्टन्टबाजीकै भरमा हामी चुनाव जित्छौं भन्ने भ्रम नपाले हुन्छ,' प्रचण्डले भने।
उनले जेनजीहरूलाई पनि भ्रममा नपर्न आग्रह गरे।
'तपाईहरूको असली अभिभावक नेपाली कम्युनिस्ट पार्टी नै हो। तपाईंहरूका एजेन्डा को वाहक नेपाली कम्युनिस्ट पार्टी नै हो अरू कोहि होइनन्। तपाईहरू कोहि भ्रम मा नपर्नुस्। तपाईहरू भ्रममा पर्नुभयो भने देशले दुख पाउछ। स्टन्टबाजहरूको होहल्लाको पछि नलाग्नु होला,' उनले भने।
-1746009348.jpg)
