नेपाली कांग्रेसका सभापति शेरबहादुर देउवासहित शीर्ष नेताहरूले प्रतिनिधि सभा पुनर्स्थापनाका पक्षमा हस्ताक्षर गरेका छैनन्।
निवर्तमान प्रमुख सचेतक श्यामकुमार घिमिरे र सचेतक सुशीला थिङसहित सांसदहरूले प्रतिनिधि सभा पुनर्स्थापनाका पक्षमा सर्वोच्च अदालतमा रिट दिएका छन्।
सोही रिटमा पक्ष कायम गर्न कांग्रेसका थप सांसदहरूले पनि हस्ताक्षर गरेका छन्।
कांग्रेसका निवर्तमान ८८ जना सांसदहरूमध्ये आइतबार दिउँसोसम्म ६६ जना सांसदहरूले हस्ताक्षर गरेको संसदीय कार्यालय स्रोतले जनाएको छ।
सभापति शेरबहादुर देउवा, कार्यवाहक सभापति पूर्णबहादुर खड्का, महामन्त्रीद्वय गगन थापा र विश्वप्रकाश शर्मा र नेता शेखर कोइरालासहित केही निवर्तमान सांसदहरूले प्रतिनिधि सभा पुनर्स्थापनाका पक्षमा हस्ताक्षर गरेका छैनन्।
‘निवर्तमान सांसद रहनुभएका सभापति, कार्यवाहक सभापति र महामन्त्रीहरूसहित शीर्ष नेताहरूले हस्ताक्षर गर्नुभएको छैन,’ संसदीय दल कार्यालय स्रोतले भन्यो, ‘हस्ताक्षरको क्रम भने चल्दैछ। शीर्ष नेताहरूले हस्ताक्षर गर्नुहुँदैन होला।’
कांग्रेसले पछिल्लो केन्द्रीय समिति बैठकबाट फागुन २१ को प्रतिनिधि सभा चुनावमा भाग लिने निर्णय गरेको थियो।
त्यसअघि केन्द्रीय समिति बैठक चल्दै गर्दा पनि निवर्तमान प्रमुख सचेतक श्यामकुमार घिमिरेको अगुवाइमा प्रतिनिधि सभा पुनर्स्थापनाका लागि हस्ताक्षर संकलन गरिएको थियो।
त्यसबेला ४५ जना सांसदहरूले हस्ताक्षर गरिसकेका थिए। तर सभापति देउवा उपचारका लागि सिंगापुरमा थिए भने कार्यवाहक सभापति खड्काले घिमिरेलाई हस्ताक्षर संकलन नगर्न भनेपछि रोकिएको थियो।
सम्बन्धित समाचार: यी हुन् प्रतिनिधिसभा पुनर्स्थापना माग गर्दै सर्वोच्च पुगेका ८ कांग्रेस सांसद
-1746009348.jpg)
