प्रमुख तीन दल नेपाली कांग्रेस, नेकपा एमाले र नेपाली कम्युनिस्ट पार्टीले नेकपा एमालेका अध्यक्ष एवं पूर्वप्रधानमन्त्री केपी शर्मा ओली र नेपाली कांग्रेसका नेता एवं पूर्वगृहमन्त्री रमेश लेखकको स्थानहदका विषयमा प्रश्न उठाएका छन्।
प्रधानमन्त्री सुशीला कार्कीले सिंहदरबारमा आयोजना गरेको छलफलमा तीन वटै राजनीतिक दलले नेताहरूलाई स्थानहद तोकेर फागुन २१ गतेको निर्वाचनको वातावरण नबन्ने बताएका हुन्।
निर्वाचन आयोग, सुरक्षा निकायका प्रमुख, राजनीतिक दलका प्रतिनिधि, नागरिक समाज र जेनजी प्रतिनिधि समेत सहभागी भएको छलफलमा दलहरूले स्थानहद तोक्ने निर्णयको विरोध गरेका हुन्।
‘स्थानहदको कुरा आएको छ। प्रतिनिधि सभामा जहाँबाट चुनाव लड्न पाउँछौं,’ कांग्रेस सहमहामन्त्री महेन्द्र यादवले भने, ‘निर्वाचन भनेर हुँदैन। निर्वाचनको वातावरण बन्नुपर्यो। निकास यही हो।’
यादवले प्रधानमन्त्री कार्कीलाई राजनीतिक दलका प्रमुख शीर्ष नेताहरूसँग छलफल गर्न सुझाव दिए।
‘नेपालको ‘फस्ट म्यान’ हजुर हो। नेपाललाई निकास पनि दिनुपर्छ,’ यादवले भने, ‘राजनीतिक दलका शीर्ष नेतासँग कुरा गर्नुस्।’
नेकपा एमालेका तर्फबाट बैठकमा सहभागी भएका सचिव महेश बस्नेतले पनि स्थानहदको विषय उठाए। उनले निर्वाचन सुरक्षाको विषयसँगै स्थान हदलाई जोडेर उठाएका हुन्।
‘पाँच सात वटा जिल्ला जाँदा मैले ढुंगा खाएको हुँ। ढुंगा खाँदा खुसीयाली मनाइएको छ। दलका नेताहरूलाई स्थानहद गरिएको छ,’ बस्नेतले भने, ‘फागुन २१ गतेमा चुनाव भएन भने संसद पुनर्स्थापना हुनेछ।’
उनले एमाले संवाद र सहकार्यबाट नभाग्ने तर पुराना दललाई निषेध नगर्न आग्रह गरे।
दलहरूलाई पछाडिबाट प्रस्ताव पठाउनुभन्दा एक्लाएक्लै कुराकानी गर्न सुझाव दिए। साथै दलहरूको चुनाव चिह्न गोलाप्रथाबाट तोक्ने गरी अध्यादेश अस्वीकार गर्ने बताए।
नेपाली कम्युनिस्ट पार्टीका राजेन्द्र पाण्डेले पनि स्थानहद गर्ने विषयको विरोध गरे।
‘चुनाव गर्ने हो भने स्थानहद गर्न हुँदैन,’ पाण्डेले प्रश्न गर्दै भने, ‘मूल पार्टीका नेतालाई स्थानहद गर्ने। चुनाव भनेको आफ्नो पार्टीको सिद्धान्त प्रचार गर्ने कुरा होइन। देशको कुना कुना जानुपर्ने होइन।’
उनले लुटिएका हतियार र गोलबारे पनि जिज्ञासा राखे।
पाण्डेले जेनजी प्रतिनिधि समेत सहभागी भएको छलफलमा आफूले २५ वर्षको उमेरमा पञ्चायतको चुनाव लडेको र २६ वर्षको उमेरमा जिल्ला पञ्चायत सभापति जितेको उल्लेख गरे।
‘जेनजी भनेको उमेर समूह हो। म २६ वर्षमा जिल्ला पञ्चायतमा सभापती हो। २५ वर्षमा चुनाव हारेको हो। हामी सानै उमेरदेखि निर्वाचनमा लडेको मान्छे हो,’ पाण्डेले भने, ‘निरंकुश राजा र पञ्चायतसँग लडेको हो। १४ वर्ष जेल जाने राष्ट्र विप्लवको मुद्दा बोकेर लडेको हो। हामी राजनीतिक व्यवस्थाका लागि प्रजातन्त्रिक व्यवस्था ल्याउन लडेका मान्छे हौँ। पुराना राजनीतिक दल भनेका सबै गलत मान्छे हुन् भन्ने नसोच्दा हुन्छ। कालकठोरीमा बसेर आएका हौं। हामी निर्वाचनको पक्षमा छौं।’
पाण्डेले पनि प्रधानमन्त्री कार्कीलाई निर्वाचनमा भाग लिने वातावरण बनाउन एक्लाएक्लै भए पनि नेताहरूसँग कुराकानी गर्न सुझाए।
-1746009348.jpg)
